አሜሪካ የመርከብ ላይ ሆስፒታሏን ወደ ግሪንላንድ ደሴት ለመላክ መወጠኗን ዴንማርክ ውድቅ አደረገችው፡፡

የካቲት 16/2018 - የውጪ ሀገራት ወሬዎች

#አሜሪካ

አሜሪካ የመርከብ ላይ ሆስፒታሏን ወደ ግሪንላንድ ደሴት ለመላክ መወጠኗን ዴንማርክ ውድቅ አደረገችው፡፡

ቀደም ሲል የአሜሪካው ፕሬዘዳንት ዶናልድ ትራምፕ የመርከብ ላይ ሆስፒታሉን ወደ ግሪንላንድ ለመላክ መወጠናቸውን በትሩዝ ማህበራዊ ትስስር ገፃቸው እወቁልኝ ማለታቸውን AFP አስታውሷል፡፡

የዴንማርኩ የመከላከያ ሚኒስትር ግሪንላንድ ይሄ ዓይነቱ የአሜሪካ የጤና ድጋፍ አያሻትም ማለታቸው ተሰምቷል፡፡

የአርክቲክ ክበቧ የአለማችን ታላቋ ደሴት ግሪንላንድ የአውሮፓዊቱ ዴንማርክ የራስ ገዝ ግዛት ነች፡፡

ትራምፕ ለአሜሪካ ደህንነት በእጅጉ አስፈላጊ በመሆኗ ከአሜሪካ ጋር መዋሐድ ይኖርበታል ሲሉ ቆይተዋል፡፡

የትራምፕ ውጥን ከዴንማርክም ሆነ ከግሪንላንዳውያ በኩል ከፍተኛ ተቃውሞ ገጥሞታል፡፡

የአሜሪካው ፕሬዘዳንት ግን ግሪንላንድን የአሜሪካ አባል የማድረግ ውጥናቸውን የመተው ምልክት አላሳዩም፡፡

#ሱዳን

ዩጋንዳ የRSF ፈጥኖ ደራሽ ሀይል አዛዥ የሆኑትን ሌተና ጄኔራል ሞሐመድ ሐምዳን ዳጋሎን ተቀብላ ማስተናገዷ የሱዳንን ወታደራዊ መንግስት ክፉኛ አስቆጣው፡፡

የሱዳን ወታደራዊ መንግስት ፣ ዩጋንዳ ሞሐመድ ሐምዳን ዳጋሎን ማስተናገዷን በሱዳን ሕዝብ ላይ የተሰነዘረ ስድብ ያህል ቆጥሬዋለሁ ማለቱን ቢቢሲ ፅፏል፡፡

የዩጋንዳው ፕሬዘዳንት ዩዌሪ ሙሴቪኒ ባለፈው ሳምንት አርብ የሱዳኑን ፈጥኖ ደራሽ ሀይል አዛዝ ሌተና ጄኔራል ሞሐመድ ሐምዳን ዳጋሎን በኢንቴቤ ቤተ መንግስት ተቀብለው አነጋግረዋቸዋል ተብሏል፡፡

ሙሴቬኒ ስለ ሰላም የሱዳኖቹን ተፋላሚዎች እንዲሸመግሉ በአፍሪካ ህብረት መሰየማቸው በመረጃው ተጠቅሷል፡፡

የሱዳን መንግስት ጦር እና የRSF ፈጥኖ ደራሽ ሀይል በጦርነት ላይ መሆናቸው ይታወቃል፡፡

ጦርነቱ በአገሪቱ ሰብአዊ ቀውሱን እያነባበረ ያለ ሁነኛ መፍትሄ ወደ 3ኛ አመቱ እየተቃረበ ነው፡፡

#አሜሪካ

በአሜሪካ ፍሎሪዳ በፕሬዘዳንት ዶናልድ ትራምፕ ወደሚተዳደረው የማራ ላጎ ቅጥር ለመዝለቅ የሞከረ ግለሰብ በፕሬዘዳንቱ ሚስጥራዊ የጥበቃ ክፍል (ሴክሬት ሰርቪስ) ባልደረቦች ተተኩሶበት ተገደለ ተባለ፡፡

ወደማራ ላጎ ቅጥር ለመዝለቅ ሲሞክር ተገደለ የተባለው በ20ዎቹ የእድሜ እርከን የሚገኝ ወጣት ሽጉጥ የታጠቀ እና በቆርቆሮ የተሞላ ተቀጣጣይ ቁስ የያዘ ነበር መባሉን አልጀዚራ ፅፏል፡፡

በአጋጣሚው ወቅት ፕሬዘዳንት ትራምፕ በዋሽንግተን ዲሲ ነበሩ ተብሏል፡፡

ከቅርብ አመታት ወዲህ ትራምፕ ተደጋጋሚ የግድያ ሙከራ እንደተደረገባቸው ተጠቅሷል፡፡

ከአመት ተኩል በፊት በዚያው በማራ ላጎ በፕሬዘዳንቱ ላይ የግድያ ሙከራ አድርጎ የነበረ ግለሰብ በቅርቡ እድሜ ይፍታህ እንደተፈረደበት መረጃው አስታውሷል፡፡

የአሜሪካ ፌዴራል የምርመራ ቢሮ (FBI) የማራ ላጎውን አዲስ አጋጣሚ በዝርዝር እያጣራው ነው ተብሏል፡፡

የሸገርን ወሬዎች፣ መረጃ እና ፕሮግራሞች ይከታተሉ…

Website፡ https://www.shegerfm.com/

YouTube : https://shorturl.at/18TS1

Telegram : https://shorturl.at/68aeK

Facebook፡ https://shorturl.at/tm5Q4

WhatsApp : https://shorturl.at/8vwRx

X :- https://x.com/shegerfm?s=2

LinkedIn: https://shorturl.at/Vfe6i

Tiktok : https://shorturl.at/lhYiv

Instagram: https://shorturl.at/9X4S7