ጥቅምት 3 2018 - የባህር ማዶ ወሬዎች

ምዕራብ አፍሪካዊቱ አገር ማሊ አሜሪካውያንም ወደኛ ለመምጣት ለቪዛ ሲያመለክቱ እስከ 10 ሺህ ዶላር የሚደርስ የዋስትና ገንዘብ እንዲያሲዙ ልጠይቅ ነው አለች፡፡

ቀደም ሲል አሜሪካ ከተለያዩ የአፍሪካ አገሮች ቪዛ የሚጠይቁ ከ5 እስከ 10 ሺህ ዶላር የዋስትና ገንዘብ እንዲያሲዙ የሚጠይቅ አሰራር ተግባራዊ እንደምታደርግ እወቁልኝ ካለች መሰንበቷን አናዶሉ አስታውሳል፡፡

አዲሱ አሰራሯን ከ10 ቀናት ባልበለጠ ጊዜ ተግባራዊ ማድረግ እንደምትጀምር ታውቋል፡፡

የማሊ መንግስት መግለጫም ለአዲሱ የአሜሪካ የቪዛ መመሪያ ምላሽ መሆኑ ተጠቅሷል፡፡

የማላዊ እና የዛምቢያ መንገደኞች የአሜሪካ ቪዛ ለማግኘት ለቃለ መጠይቅ ከመቅረባቸው አስቀድሞ ከ5 እስከ 15 ሺህ የአሜሪካ ዶላር በዋስትና ማስያዝ እንደሚጠበቅባቸው መረጃው አስታውሷል፡፡

ካሜሩናውያን ቀጣይ ፕሬዘዳንታቸው ለመምረጥ ትናንት ድምፅ ሲሰጡ ዋሉ፡፡

አገሪቱን ላለፉት 43 ዓመታት የመሯት ፕሬዘዳንት ፖል ቢያ የአሁኑም ምርጫ እጩ ተፎካካሪ እንደሆኑ አልጀዚራ ፅፏል፡፡

የ92 አመቱ ፖል ቢያ ለፕሬዘዳንትንት ሲፎካከሩ የአሁኑ 8ኛቸው እንደሆነ መረጃው አስታውሷል፡፡

ፖል ቢያ በአለማችንም በአሁኑ ወቅት በእድሜ አረጋዊው መሪ ናቸው ይባላል፡፡

በአገሪቱ የአሁኑ ፕሬዘዳንታዊ ምርጫ የተካሄደው ለብዙዎቹ ካሜሩናውያን የኑሮ ውድነቱ ፈተናው እየከበደ በመጣበት ወቅት እንደሆነ ተጠቅሷል፡፡

ውጤቱን የአገሪቱ ህገ መንግስታዊ ምክር ቤት ከ2 ሳምንታት ባልበለጠ ጊዜ እወቁልኝ እንደሚል ታውቋል፡፡

በማዳጋስካር ከዋናው ጦር ሀይል ያፈነገጠ ነው የተባለ የጦር ክፍል የአገሪቱ ወታደሮች አጠቃላይ ትዕዛዝ መቀበል ያለባቸው ከእኔ ብቻ መሆን ይገባዋል ማለቱ ተሰማ፡፡

ህዝባዊ ተቃውሞ በርትቶበት የሰነበተው የፕሬዘዳንት አንድሬይ ራጆሊና አስተዳደር ህገወጥ እና በሀይል የታጀበ የስልጣን ቅሚያ እየተደረገብኝ ነው የሚል መግለጫ ማውጣቱን አልጀዚራ ፅፏል፡፡

ይሁንና የስልጣን ንጥቂያውን ሁኔታ በመግለጫው በዝርዝር አላብራራውም ተብሏል፡፡

ካፕሳት የተሰኘው አፈንጋጩ የጦር ክፍል አዛዦቹ የመንግስትን ትዕዛዝ እንዳያከብሩ ማስጠንቀቁ ተሰምቷል፡፡

የጦር ክፍሉ በፕሬዘዳንት አንድሬይ ራጆሊና አስተዳደር ላይ ተቃውሟቸውን ያበረቱትን ወጣቶች እጠብቃቸዋሁ ማለቱ ተጠቅሷል፡፡

የማዳጋስካሩ ፖለቲካዊ ቀውስ ከእለት ወደ እለት እየተባባሰ ነው፡፡

በኤሌክትሪክ እና በውሃ አገልግሎቶች መቆራረጥ ምክንያት የተቀሰቀሰው ተቃውሞ ከ3 ሳምንታት በላይ ማስቆጠሩን መረጃው አስታውሷል፡፡

የፍልስጤማውያኑ ታጣቂ ቡድን ሐማስ 7 እስራኤላዊያን ታጋቾችን ለአለም አቀፉ የቀይ መስቀል ኮሚቴ ማስረከቡ ተሰማ፡፡

እስራኤል እና ሐማስ ቀደም ሲል በፈረሙት የተኩስ አቁም ስምምነት መሰረት ሐማስ በእጁ የሚገኙ 48 እስራኤላዊያን ታጋቾችን በሙሉ ማስረከብ እንደሚጠበቅበት አልጀዚራ ፅፏል፡፡

ከእስራኤላዊያኑ ታጋቾች መካከል 20ዎቹ በሕይወት እንዳሉ ይገመታል፡፡

ሐማስ በተለያዩ ምክንያቶች የሞቱ ታጋቾችን አስከሬንም እንደሚያስረክብ ይጠበቃል፡፡

እስራኤልም ከባድ ፍርደኞችን ጨምሮ 2 ሺህ ያህል ፍልስጤማውያን እስረኞችን ትፈታለች ተብሏል፡፡

ቀደም ሲል የአሜሪካው ፕሬዘዳንት ዶናልድ ትራምፕ የጋዛው ጦርነት አብቅቷል ማለታቸውን መረጃው አስታውሷል፡፡

የኔነህ ከበደ

የሸገርን ወሬዎች፣ መረጃ እና ፕሮግራሞች ይከታተሉ…

👇👇👇

Recent Posts