የሐምሌ 22 2018 የውጪ ሀገር ወሬዎች

#አሜሪካ

አሜሪካ እና ሳውዲ አረቢያ ኢራቅ ውስጥ በአፍቃሪ ኢራን ታጣቂዎች ይዞታ ላይ ድብደባ ፈፀሙ፡፡

ሰሞኑን ሳውዲ አረቢያ በኢራቅ የሚገኙ አፍቃሪ ኢራን ታጣቂዎች በድሮን ጥቃት አድርሰውብኛል ስትል እንደነበር አልጀዚራ አስታውሷል፡፡

ሳውዲ ጥቃቱን ከማውገዝ በተጨማሪ መበቀሌ አይቀርም በሚል ዝታ ነበር፡፡

በኢራቆቹ አፍቃሪ ኢራን ታጣቂዎች ላይ አሜሪካ እና ሳውዲ በፈፀሙት ጥምር ድብደባ ከ20 የማያንሱት መገደላቸው ተሰምቷል፡፡

በሌላ መረጃ አብዮታዊ ዘብ የተሰኘው የኢራን የጦር ክፍል በዮርዳኖስ በሚገኝ የአሜሪካ የጦር ተቋም ላይ ያነጣጠረ ጥቃት ሰንዝሬያለሁ ማለቱ ተሰምቷል፡፡

የዮርዳኖስ ጦር አምስት ሚሳየሎችን መትቼ አሰናክያለሁ ማለቱ ተሰምቷል፡፡ ስለ ዮርዳኖሱ ጥቃት ከአሜሪካ በኩል የተሰጠ አስተያየት የለም፡፡

የወደፊቱን የሆርሙዝ የባህር መተላለፊያ ወሽመጥ የአካባቢው አገሮች የጋራ አስተዳደር በተመለከተ በኦማን የቀረበው አዲስ ምክረ ሐሳብ ኢራን ተቃውመዋለች ተብሏል፡፡

የሆርሙዝ ወሽመጥ አወዛጋቢነት እየጨመረ መምጣቱ ይነገራል፡፡

#ኮንጎ

በኮንጎ ኪንሻሣ የኢቦላ ሕሙማን ብዛት ከ3 ሺህ 260 በላይ ደረሰ፡፡

በአገሪቱ አዲሱ የኢቦላ ወረርሽኝ ከተቀሰቀሰ ከ2 ወር ተኩል በላይ ሆኖታል፡፡

እስካሁንም በወረርሽኙ የ1 ሺህ 437 ሰዎች ሕይወት ማለፉን የጤና መረጃዎች እንደሚያሳዩ ዘ ዋሽንግተን ፖስት ፅፏል፡፡

ኢቱሪ የተሰኘችዋ የምስራቃዊ ኮንጎ ግዛት የወረርሽኙ ተፅዕኖ ያየለባት ነች ተብሏል፡፡

ወረርሽኙ በከፍተኛ ፍጥነት በመዛመት ላይ እንደሚገኝ እለታዊ የጤና መረጃው ያሳያል፡፡

ከ6 አመታት በፊት በአካባቢው ተቀስቅሶ የነበረው የኢቦላ ወረርሽኝ የከሰመው ከ2 ሺህ 400 በላይ ሰዎችን ከገደለ በኋላ እንደነበር መረጃው አስታውሷል፡፡

ከ10 አመታት በፊት የምዕራብ አፍሪካዎቹን ጊኒን ፣ ሴራሊዮንን እና ላይቤሪያን ያዳረሰው የኢቦላ ወረርሽኝ በታሪክ ተስተካካይ የለውም፡፡

የምዕራብ አፍሪካው የኢቦላ ወረርሽኝ ከ11 ሺህ በላይ ሰዎችን መጨረሱ ለትውስታ ተጠቅሷል፡፡

#ኢራን

የኢራን ፓርላማ የደህንነት እና የውጭ ግንኙነት ኮሚቴ አባል የሆኑት ፌዳ ሁሴን ማሌኪ ዩክሬይን በካስፒያን ባህር በንግድ መርከባችን ላይ ለሰነዘረችው የድሮን ጥቃት የእጇን እንሰማታለን ሲሉ ዛቱ፡፡

ቅዳሜ እለት በኢራኗ የንግድ መርከብ ላይ ዩክሬይን በፈፀመችው የድሮን ድብደባ አንድ ባሕረኛ ሲገደል ሌላኛው ደግሞ አካላዊ ጉዳት እንደገጠመው አልጀዚራ አስታውሷል፡፡

ዩክሬይን ጥቃቱን ስለማድረሷ አልሸሸገችም፡፡

የኢራኑ መርከብ ለሩሲያ የሚሰጥ የጦር መሳሪያ የጫነ እንደነበር የዩክሬይኑ ፕሬዘዳንት ቮሎድሚር ዜሌንስኪ ተናግረዋል፡፡

ዩክሬይን ከሩሲያ ጋር የገጠመችው ጦርነት ከ4 አመታት በላይ አስቆጥሯል፡፡

ምስራቅ አውሮፓዊቱ አገር በካስፒያን ባህር ይህን መሰሉን ጥቃት ስታደርስ የቅዳሜ እለቱ የመጀመሪያው ነው ተብሏል፡፡

ዩክሬይን ከቅርብ ወራት ወዲህ በአጥቂ ሰው አልባ በራሪዎች /ድሮኖች/ የራቁ ዒላማዎችን በመምታቱ ረገድ እየተሳካላት ነው ይባላል፡፡

#ጃፖን

የጃፓንን ደቡባዊ ምዕራብ ክፍል የመታው የመሬት ነውጥ በጥቂቱ 13 ሰዎችን መግደሉን የአገሪቱ ጠቅላይ ሚኒስትር ሳናይ ታኪአይቺ ተናገሩ፡፡

ነውጡ በርዕደ መሬት መለኪያ /ሬክተር ስኬል/ 7 ነጥብ 1 ሆኖ እንደተመዘገበ ቢቢሲ ፅፏል፡፡

ነውጡ የደረሰው ኩማሞቶ ተብሎ በሚጠራው የአገሪቱ ክፍል ነው፡፡

በአደጋው መሞታቸው ከተረጋገጠው በተጨማሪ በህንፃ ፍርስራሽ ስር የተቀበሩ ብዙዎች እንደሆኑ ተሰግቷል፡፡

በአንድ የገበያ ማዕከል ህንፃ ከነውጡ በተጨማሪ ፍንዳታም አጋጥሟል ተብሏል፡፡

በሌላ የወረቀት ፋብሪካ ደግሞ የጭስ ማውጫ አካል በመደርመሱ ፍርስራሹ የተጫናቸው እንዳሉ ታውቋል፡፡

የአደጋ ተከላካዮች ለነፍስ አድኑ ተግባር እየተረባረቡ ነው ተብሏል፡፡ ያም ሆኖ በስፍራው ያለው እጅግ ከፍተኛ የሆነ ሙቀት ለነፍስ አድን ሰራተኞቹ ታላቅ ፈተና መሆኑ ተጠቅሷል፡፡

ነውጡ በርካታ መንገዶችን በመሰባበር ጉዳት አድርሷል፡፡ በኩዩሹ ደሴት በዚሁ የነውጥ አደጋ ምክንያት የባቡር አገልግሎቱን ሙሉ በሙሉ እንዲቆም ማስገደዱን መረጃው አስታውሷል፡፡

የኔነህ ከበደ