የልብ ህመም ለገጠማቸውና ወረፋ ለሚጠባበቁ ህፃናት ከእንግሊዝ በመጡ ባለሙያዎች ህክምና እየተሰጠ ነው ተባለ፡፡

ህዳር 16 2018

በልብ በር መጥበብ እንዲሁም በኢንፌክሽን ምክንያት የልብ ህመም ለገጠማቸውና ወረፋ ለሚጠባበቁ ህፃናት ከእንግሊዝ በመጡ ባለሙያዎች ህክምና እየተሰጠ ነው ተባለ፡፡

በኢትዮጵያ ልብ ህሙማን ህጻናት መርጃ ማዕከል ውስጥ ካሉ አብዛኛዎቹ በዚህ ችግር ምክንያት የመጡ ህፃናት መሆናቸው ተነግሯል፡፡

ህክምናው ልብ ሳይከፈት በደምስር የሚሰጥ የልብ ህክምና አይነት መሆኑን የነገሩን የኢትዮጵያ የልብ ህሙማን ህጻናት መርጃ ማዕከል የህዝብ ግንኙነት ኃላፊ ዶ/ር ዳዊት እሸቱ ከህክምና ስራው ባለፈ ለማዕከሉ የሚያስፈልጉ አላቂ የህክምና ዕቃዎች ድጋፍ ይገኝበታል ብለዋል፡፡

በዚህ ዙር ከ18-20 ህፃናት ህክምናው እንደሚሰራላቸውም ተናግረዋል፡፡

በማዕከሉ አሁንም ድረስ ወረፋ የሚጠባበቁ 8 000 ያህል ህፃናት መኖራቸውን የሚናገሩት ዶክተር ዳዊት አብዛኛዎቹ የዚህ ቀዶ ህክምና የሚያስፈልጋቸው ናቸው፤ ወደ ማዕከሉ የሚመጡ ህፃናት ቁጥርም በየዓመቱ ከሚሰራው በላይ እየጨመረ ነው ብለዋል፡፡

በማዕከሉ በዓመት እስከ 650 ለሚሆኑ ህጻናት የልብ ቀዶ ህክምና ይሰራል በሌላ በኩል በየዓመቱ 1300 አዳዲስ ህጻናት ወደ ማዕከሉ ይመጣሉ ተብሏል፡፡

ትልቁን ቁጥር የሚይዘው ይህ የልብ ህመም አይነት ነው የሚሉት ዶክተር ዳዊት በልጅነት የሚከሰቱ በተለያዩ ኢንፌክሽኖች ምክንያት የልብ በሮች ላይ ጉዳት ይደርሳል፤ ይህ ደግሞ የተለያዩ ችግሮችን ያመጣል ብለዋል፡፡

አሁን በዚህ የህክምና ተልዕኮ ህክምናው የሚሰራላቸው የልብ በር መጥበብ ችግር ያለባቸው ልጆች መሆናቸውም ተነግሯል፡፡

ቼን ኦፍ ሆፕ የተባለው የህክምና ተልዕኮ ቡድን ከኢትዮጵያ ልብ ህሙማን ህጻናት መርጃ ማዕከል ጋር ከ 20 ዓመታት በላይ በጋራ ሲሰራ መቆየቱ የተነገረ ሲሆን ለዚህ የህክምና ተልዕኮ በዚህ አመት ብቻ ለሁለተኛ ጊዜ ወደ ኢትዮጵያ መምጣቱን ሰምተናል፡፡

ሙሉ ዘገባውን ያድምጡ….

ምህረት ስዩም

የሸገርን ወሬዎች፣ መረጃ እና ፕሮግራሞች ይከታተሉ…

👇👇👇

🌐Website፡ https://www.shegerfm.com/

🎥YouTube https://tinyurl.com/37tux478

🟦Telegram https://t.me/ShegerFMRadio102_1

📘Facebook፡ https://tinyurl.com/4tx8t8wm

💬WhatsApp ፡ https://tinyurl.com/ycxjmm3s

🐦X : https://x.com/shegerfm?s=2