ዘንድሮ በሚካሄደው ሰባተኛ ሀገራዊ ምርጫ የተፎካካሪ ፓርቲዎች የተሻለ ድምፅ በፓርላማው እንዲኖራቸው እንደሚፈልጉ ጠቅላይ ሚኒስትር ዐቢይ አህመድ ተናገሩ።

ጥር 26/2018

መንግስት ስራውን ትቶ በምርጫ ስራ ላይ አተኩሯል በሚል ለቀረበው ጥያቄ ጠቅላይ ሚንስትሩ ሲመልሱ ብልፅግና ፓርቲ ምርጫው ላይ አተኩራችሁ እየሰራችሁ አይደለም ዋና ትኩረታችን በመንግስት ስራ ላይ ነው እያሉን ነው ብለዋል።

ከምርጫ ቅስቀሳ ጋር በተያያዘ ወጣቱን ለመድረስ አሁን ያሉ ቴክኖሎጂዎችን መጠቀም የተሻለ ነው የህዝብ መገናኛ ብዙሃን ለሁሉም እኩል ተደራሽ እንዲሆን እንሰራለን ብለዋል ጠቅላይ ሚንስትሩ።

ከፀጥታ ጋር በተያያዘ ለምርጫው ስጋት ነው ተብሎ ለተነሳው ጥያቄ ሲመልሱ ባለፉት 6 ወራት በተደረጉ የአደባባይ በዓላት ምንም ችግር ሳይፈጠር ተጠናቋል ታዲያ ምርጫው ሲደረግ እንዴት የፀጥታ ስጋት ይሆናል ሲሉም ጠይቀዋል።

መንግስት ምርጫውን ለማድረግ ዝግጁ ነው በምርጫው የተፎካካሪ ፓርቲዎች የድምፅ ተሳትፎ ከባለፈው የተሻለ እንዲሆን ነው እየሰራን ያለነው ብለዋል።

በሀገራዊ ምክክር ማንም እንዲሳተፍ ነው የተፈቀደው ፍላጎት የሌለውን ቡድን ግን ማስገደድ አይቻልም ሲሉም ተናግረዋል።

የኮሚሽኑ ቀጣይ ስራ ተወያዮችን አወያይቶ ለመንግስትና ለምክርቤቱ ምክረ ሀሳብ ማቅረብ ነው ተብሏል።

በረከት አካሉ

የሸገርን ወሬዎች፣ መረጃ እና ፕሮግራሞች ይከታተሉ…