በሆንግ ኮንግ ከ83 ያላነሱ ሰዎችን የገደለው የመኖሪያ ሕንፃዎች ቃጠሎ መጥፋቱ ተሰማ፡፡

ህዳር 19 2018 - የውጪ ሀገራት ወሬዎች

በሆንግ ኮንግ ከ83 ያላነሱ ሰዎችን የገደለው የመኖሪያ ሕንፃዎች ቃጠሎ ከበርካታ ሰዓታት በኋላ መጥፋቱ ተሰማ፡፡

ቃጠሎው በአካባቢው ከነበሩ 8 የመኖሪያ ሕንፃዎች 7ቱን እንዳልነበሩ መደረጉን ቢቢሲ ፅፏል፡፡

በአደጋው መሞታቸው ከተረጋገጠው ሌላ ሌሎች ሰለባዎች ካሉ ፍለጋው መቀጠሉ ታውቋል፡፡

ቃጠሎው ከገደላቸው ሌላ 76 ሰዎች ደግሞ የተለያየ ደረጃ አካላዊ ጉዳት ደርሶባቸዋል ተብሏል፡፡

270 ሰዎች ደግሞ ገና እጣ ፈንታቸው እንዳልለየ ተጠቅሷል፡፡

በዚህ ምክንያት የአደጋው ሟቾች ብዛት ሊጨምር ይችላል ተብሎ ተሰግቷል፡፡

የመኖሪያ ሕንፃዎቹ ቃጠሎ በግዛቲቱ እጅግ ከባድ ነው ተብሏል፡፡

የአደጋው መንስኤ ገና አልተነገረም፡፡

ለጥገና አገልግሎት የተተከሉ ቀርክሃ ስሪት የህንፃ መወጣጫዎች ቃጠሎውን ማባባሳቸው ይነገራል፡፡

በጊኒ ቢሳኦ ዋነኛው ተቃዋሚ የፖለቲካ ማህበር ፕሬዘዳንት ኡማሮ ሲስኮ ኢማባሎ መንግስታቸውን ያስገለበጡት በሐሰት ነው አለ፡፡

የግልበጣው ሴራ ፕሬዘዳንቱ ስልጣን ላይ የሙጥኝ ብለው ለመቆየት የዘየዱት ነው ማለቱን አፍሪካ ኒውስ ፅፏል፡፡

በጊኒ ቢሳኦ የመንግስት ግልበጣው የተሰማው ባለፈው እሁድ ፕሬዘዳንታዊ እና የፓርላማ አባላት ምርጫ መደረጉን ተከትሎ ነው፡፡

በፕሬዘዳንታዊ ምርጫው ተቃዋሚውን የፖለቲካ ማህበር ወክለው የተፎካከሩት ፈርናንዶ ዲያስ በምርጫው ያሸነፍኩት እኔ ነኝ እያሉ ነው፡፡

መፈንቅለ መንግስቱም የምርጫ ድሌን ለመንጠቅ የተዶለተ ነው ማለታቸው ተሰምቷል፡፡

ሕዝቡም ግልበጣውን እንዲያወግዝ እና እንዲቃወም የፖለቲካ ማህበራቸው ጥሪ አቅርቧል፡፡

የአፍሪካ ህብረት ኮሚሽን ግልበጣውን አውግዞ የምርጫው ሂደት ወደ ነበረበት እንዲመለስ ጠይቋል፡፡

ገልባጮቹ የጦር መኮንኖች ፕሬዘዳንት ኢምባሎን ከእስር ሊፈቱ ይገባል ብሏል፡፡

ፕሬዘዳንቱ በአሁኑ ወቅት የት እንዳሉ አይታወቅም፡፡

ከአፍሪካ ህብረት በተጨማሪ ጋና እና ናይጀሪያም የጊኒ ቢሳኦውን ግልበጣ አምርረው ማውገዛቸው ተሰምቷል፡፡

በሌላ በኩል የጊኒ ቢሳኦ ወታደራዊ የመንግስት ገልባጮች ጄኔራል ሆርታ ኤንታ አ የተባሉትን የጦር መኮንን በመሪነት ሰይሞል፡፡

የአገሪቱ የጦር መኮንኖች ከትናንት በስቲያ የፕሬዘዳንት ኡማሮ ሲስኮ ኢምባሎን መንግስት መገልበጣቸውን አፍሪካ ኒውስ አስታውሷል፡፡

ገልባጮቹ የአንድ አመት የሽግግር ጊዜ ይኖረናል ማለታቸው ተጠቅሷል፡፡

የግልበጣው መሪ የተደረጉት ጄኔራል ኢንታ አ እስከ ግልበጣው ወቅት የአገሪቱ ጦር ኤታ ማጆር ሹም ነበሩ ተብሏል፡፡

ቀደም ሲል በገልባጮቹ ተይዘው ታስረዋል የተባሉት ኡማሮ ሲስኮ ኢምባሎ የት እንደሚገኙ በትክክል አይታወቅም፡፡

በጊኒ ቢሳዎ ወታደራዊ የመንግስት ግልበጣ የተደረገው ባለፈው እሁድ በአገሪቱ ፕሬዘዳንታዊ እና የፓርላማ አባሎች ምርጫ ከተከናወነ በኋላ ነው፡፡

በአገሪቱ ዋነኛው የተቃዋሚዎች የፖለቲካ ማህበር ሕዝቡ ግልበጣውን እንዲቃወም እና እንዲያወግዝ ጥሪ ማቅረቡ ተሰምቷል፡፡

የሱዳን መንግስት አሜሪካ ከማንኛውም የሰላም ጥረት በፊት አስቀድሜ አማክርሃለሁ ማለቷን እሰየው አለው፡፡

አሜሪካ በማንኛውም የሰላም ውጥን አስቀድማ መቀመጫውን በፖርት ሱዳን ያደረገውን የሱዳን ሉአላዊ ምክር ቤት እንደምታማክር የኖርዌይ መንግስት ተወካይ አንድሪያስ ክራቪክ ተናግረዋል፡፡

ክራቪክ በዚህ ጉዳይ ከአሜሪካ ሹሞች ጋር እንደመከሩበት ተናግረዋል፡፡

ኖርዌይ ቀደም ሲል አንስቶ ከአሜሪካ እና ከብሪታንያ ጋር በመሆን በሱዳን ሰላም አንዲሰፍን እና አገሪቱ እንድትረጋጋ ስትጥር ቆይታለች፡፡

በቅርቡ የአሜሪካው ፕሬዘዳንት ዶናልድ ትራምፕ ከሳውዲ አረቢያው አልጋ ወራሽ ሞሐመድ ቢን ሳልማን ጋር በተነጋገሩበት ወቅት የሱዳኑን ጦርነት አስቆመዋለሁ ማለታቸው ተሰምቷል፡፡

የሱዳን መንግስት በሰላም ጥረቱ ጉዳይ በአሜሪካ አስቀድመን እናማክርሃለን መባሉን በደስታ መቀበሉን አናዶሉ ፅፏል፡፡

የኔነህ ከበደ

የሸገርን ወሬዎች፣ መረጃ እና ፕሮግራሞች ይከታተሉ…

👇👇👇