ባለፉት 3 ወራት ለኬንያ እና ጅቡቲ በሽያጭ ከቀረበ የኤሌክትሪክ ሃይል፤ ከ34 ሚሊየን የአሜሪካ ዶላር በላይ መገኘቱ ተነገረ።   በሱዳን ያለው ግጭት በመሰረተ ልማቶች ላይ ጉዳት በማስከተሉ በጊዜ ማዕቀፉ የኤሌክትሪክ ሃይል ለሀገሪቱ በሽያጭ አልቀረበም ተብሏል።   በሌላ በኩል በሶስት ወራቱ ከውሃ ከመነጨው የኤሌክትሪክ ሃይል ግማሽ የሚሆነው ከታላቁ የኢትዮጵያ ህዳሴ ግድብ የተገኘ እንደሆነ ሠምተናል።   ከሃምሌ 1 ቀን 2017 እስከ መስከረም 30/2018 ባሉት ሶስት ወራት ኢትዮጵያ 9,208 ጊጋ ዋት ሰአት የኤሌክትሪክ ሃይል አመነጭታለች ተብሏል።   ከዚህ የኤሌክትሪክ ሃይል 98 በመቶ ወይም 9,027 ጊጋ ዋት ሰአቱ ከውሃ የሃይል ማመንጫ ገድቦች የተገኘ እንደሆነ ፤ የኢትዮጵያ ኤሌክትሪክ ኃይል የኮሚኒኬሽን ዳይሬክተር አቶ ሞገስ መኮንን ነግረውናል፡፡