የአሜሪካ ጦር በዚህ ሳምንት መጨረሻ ኢራንን ለመምታት መዘጋጀቱን ተሰማ፡፡

የካቲት 12/2018

ዋሽንግተንን ቴህራንን በሳምንቱ መጨረሻ ቀናት ለመምታት ዝግጅት ማድረጓን ለጉዳዩ ቅርበት ያላቸውን ሰዎች ነግረውናል ብሎ የዘገበው ሲ ኤን ኤን ነው፡፡

ፕሬዘዳንት ዶናልድ ትራምፕ ግን የመጨረሻውን ውሳኔ አለመስጠታቸው በመረጃ ተጠቅሷል፡፡

የአሜሪካ ብሔራዊ ደህንነት ከፍተኛ ባለስልጣናት በትላንትናው እለት በዋይት ሐውስ ተገኝተው በኢራን ጉዳይ ላይ ውይይት ማድረጋቸውም ተነግሯል፡፡

ትራምፕም ከኢራን ጋር ስለተደረገው ድርድር ሁኔታ ከልዩ መልዕክተኛው ስቲቭ ዊትኮፍ እና ከአማቻቸው ጃሬድ ኩሽነር ማብራሪያ እንደተሰጣቸው በመረጃው ተነስቷል፡፡

አሜሪካና ኢራን ያደረጉት ትራምፕ ቀይ መስመር በሚላቸው ጉዳዮች ላይ አሁንም ከስምምነት አለመድረሱ ተዘግቧል፡፡

በተጨማሪም አሜሪካ በሶሪያ የቀሯትን ወታደሮች ልታስወጣ ተነግሯል፡፡

ዋሽንግተን ከሶሪያ ወታደሮቿን በሚቀጥሉት ጥቂት ወራት ውስጥ ለማስወጣት መዘጋጀቷን የዋይት ሐውስ ምንጮቼ ነግረውናል ብሎ ቢቢሲ ፅፏል፡፡

አሜሪካ ወደዚህ እርምጃ የገባችው ሶሪያ በግዛቷ ውስጥ ሽብርተኝነትን በመዋጋት በኩል የመሪነት ሚና እንድትጫወት ለማስቻልና በዚያ የአሜሪካ ሀይል በከፍተኛ ቁጥር መኖር ከዚህ በኋላ አስፈላጊ ሆኖ ባለመገኘቱ ነው ተብሏል፡፡

የአሜሪካ ወታደሮች የአይ ኤስ ተፅዕኖንን ለመግታት የፀረ ሽብር ዘመቻ አካል ሆነው ባለፉት 11 አመታት በሶሪያ ውስጥ መቆየታቸው መረጃው አስታውሷል፡፡

በዚህ አመት መጀመሪያ አካባቢ በሶሪያ ከሚገኙ ሁለት የጦር ሰፈሮች የአሜሪካ ወታደሮች ለቀው መውጣታቸውም ተጠቅሷል፡፡

አሜሪካ ከሶሪያ ቀሪ ወታደሮቿን ለማስወጣት የወሰነችው ከኢራን ጋር የገባችው ፍጥጫ እየተካረረ ባለበት አጋጣሚ ነው፡፡

ንጋቱ ሙሉ

የሸገርን ወሬዎች፣ መረጃ እና ፕሮግራሞች ይከታተሉ…

Recent Posts