የሐምሌ 28 2018 የውጪ ሀገር ወሬዎች

#የመን

አለም አቀፉ ዕውቅና አለው የሚባለው የየመን መንግስት ወታደሮቼ በጣም ብዙ የሁቲ ታጣቂዎችን ገደሉ አለ፡፡

በደፈናው በጣም ብዙ የሁቲ ታጣቂዎችን ሙት እና ቁስለኛ አድርገናል ቢልም ብዛታቸውን በአሃዝ ይሄን ያህል ነው እንዳላለ ሚድል ኢስት ሞኒተር ፅፏል፡፡

የሁቲ ታጣቂዎቹ የተገደሉ በደቡባዊ ምዕራቧ ታይዝ ግዛት በተካሄዱ ውጊያዎች ነው ተብሏል፡፡

በጣም ብዙ ታጣቂዎቻቸው ተገድለዋል ስለመባሉ ሁቲዎቹ ምንም ዓይነት አስተያየት እንዳልሰጡ ተጠቅሷል፡፡

አለም አቀፍ እውቅና አለው የሚባለው የየመን መንግስት መቀመጫው በደቡባዊቱ የወደብ ከተማ ኤደን ነው፡፡

የኢራን ሽርካዎች ናቸው የሚባሉት ሁቲዎቹ ርዕሰ ከተማዋ ሰንዓን ጨምሮ አብዛኛውን የየመን ሰሜናዊ ክፍል ሲያስተዳድሩ ከ10 አመታት በላይ ሆኗቸዋል፡፡

#እስራኤል

ሁለት እስራኤላዊያን ሚኒስትሮች ጠቅላይ ሚኒስትር ቤኒያሚን ኔታንያሁ በማንኛውም ሁኔታ በጋዛ ሰርጥ አለም አቀፋዊ አረጋጊ ሀይል መስፈሩን ሊፈቅዱ አይገባም አሉ፡፡

በጋዛ አለም አቀፍ አረጋጊው እንዳይሰፍር ጥያቄውን ያቀረቡት የገንዘብ ሚኒስትሩ ቤዛሌል ስሞትሪች እና የሰፈራ ሚኒስትሩ ኦሪት ስትሮክ እንደሆኑ ታይምስ ኦፍ ኢዝራኤል መዘገቡን አናዶሉ ፅፏል፡፡

የአሜሪካው ፕሬዘዳንት ዶናልድ ትራምፕ ቀደም ሲል ለጋዛ ሰርጥ ሰላም ያቀረቡት ባለ 20 ነጥቦች እቅድ በሰርጡ አለም አቀፍ አረጋጊ ሀይል እንዲሰፍር የሚጠይቅ ጭምር እንደሆነ መረጃው አስታውሷል፡፡

ባለፈው ሳምንት የእስራኤል የደህንነት ካቢኔ አረጋጊ ሀይሉ በጋዛ እንዲሰፍር ውሳኔ አሳልፏል ተብሏል፡፡

ሁለቱ ሚኒስትሮች የአረጋጊ ሀይሉን መስፈር የተቃወሙት የፍልስጡማውያኑ የጦር እና የፖለቲካ ድርጅት (ሐማስ) ትጥቅ የማስረክበው በሰርጡ ለሚሰፍረው አለም አቀፋዊ አረጋጊ ሀይል ነው ማለቱን ተከትሎ ነው፡፡

ሁለቱ እስራኤላዊያን ሚኒስትሮች የአለም አቀፉን አረጋጊ ሀይል በጋዛ መስፈር መቃወማቸው የሐማስን ትጥቅ የመፍታት ጉዳይ አስቸጋሪ ሊያደርገው እንደሚችል ተገምቷል፡፡

#አሜሪካ

የአሜሪካው ፕሬዘዳንት ዶናልድ ትራምፕ ኢራን ለጦርነቱ ማስቆሚያ በሚደረገው ድርድር ከመስማማት በስተቀር እድሏ በጣም ጠባብ ነው አሉ፡፡

ትራምፕ ኢራን ካልተስማማች ሙሉ በሙሉ እጅ መስጠት ሊያስከትልባት ይችላል ማለታቸው አልጀዚራ ፅፏል፡፡

ትራምፕ ኢራን አመነችም አላመነችም ይሄ መሆኑ አይቀርም ማለታቸው ተሰምቷል፡፡

የአሜሪካው ፕሬዘዳንት ወደ አዲሱ ዛቻ የተመለሱት ኢራንን ማጥቃቴን የገታሁት ኢራንን ጨምሮ የአካባቢው አገሮች ስለተማፀኑኝ ነው ካሉ በኋላ ነው፡፡

የኢራን አብዮታዊ ዘብ የምድር ጦር አዛዥ ሞሐማድ ካራሚ ጦራቸው የመጣውን ሁሉ እንደ አመጣጡ ለመመለስ በሙሉ ተጠንቀቅ ላይ ነው ማለታቸው ተሰምቷል፡፡

የጦር አዛዡ በሁሉም መስክ ተዘጋጅተን እየጠበቅን ነው ብለዋል፡፡

የኢራኑ ጦርነት ቆመ ከመባሉ የማገርሸት አባዜ እንደተጠናወተው መረጃው አስታውሷል፡፡

ትራምፕ ለኢራን ይሄ የመጨረሻ ማስጠንቀቂያዬ ነው ማለታቸው ተሰምቷል፡፡

#ስፔን

ሰሞኑን በብዙ ሺህዎች የሚቆጠሩ ጥገኝነት ፈላጊዎች ባህሩን በመዋኘት ከሞሮኮ ተሸግረው ወደ ሰሜን አፍሪካዋ የስፔን ሴኡታ ግዛት የገቡት በየማህበራዊ ገፁ በተናፈሰው ሐሰተኛ መረጃ ተገፋፍተው ነው ተባለ።

ስደተኞቹ ከሞሮኮ ባህሩን በዋና አቋርጠው ከመግባታቸው አስቀድሞ እንደ ፌስ ቡክ እና ኢንስታግራም ባሉ የማህበራዊ ትስስር ገፆች ስፔን የሴኡታን ድንበር ከፍታለች የሚል ሰሐተኛ ወሬ በስፋት ተናፍሶ እንደነበር በአሼትድ ፕሬስ ፅፏል፡፡

ባለፈው ሳምንት በ24 ሰዓታት ጊዜ ብቻ ከ60 ሺህ በላይ ጥገኝነት ፈላጊዎች ወደ ሴኡታ ገብተው ነበር፡፡

ባህርን ዋኝተው በማቋረጥ ወደ ሴኡታ ለመግባት ከሞከሩት መካከል ከ80 የማያንሱት በባህር ላይ መሞታቸው ተጠቅሷል፡፡

ስፔን በሴኡታ የፀጥታ ሀይሏን እያጠናከረች ነው፡፡

ዋኝተው ወደ ሴኡታ ከገቡት ጥገኝነት ፈላጊዎች ሙሉ በሙሉ በሚባል ሁኔታ ወደተነሱባት መሮኮ እንዲመለሱ መደረጉ ታውቋል፡፡

አሁንም በብዙ ሺህዎች የሚቆጠሩ ጥገኝነት ፈላጊዎች ዳግም ባህሩን በዋና አቋርጠው ወደ ሴኡታ የመግባት ፍላጎት እንዳቸው ተሰምቷል፡፡

የኔነህ ከበደ