ነሀሴ 30 2017 - ከረጃጅም ፅሁፎች ይልቅ አጠር አጠር ወዳሉና ሰዓታት ከሚፈጁ ቃለ መጠይቆች ወይም ንግግሮች ይልቅ በሴኮንድ ግፋ ቢል በደቂቃ እድሜ ወደ ሚያልቁት ማዘንበል

ከረጃጅም ፅሁፎች ይልቅ አጠር አጠር ወዳሉና ሰዓታት ከሚፈጁ ቃለ መጠይቆች ወይም ንግግሮች ይልቅ በሴኮንድ ግፋ ቢል በደቂቃ እድሜ ወደ ሚያልቁት ማዘንበል በስፋት እየተስተዋለ መሆኑ ይነገራል፡፡ ለዚህ ደግሞ እንደ ቲክቶክ ዩቲዩብ ያሉ መተግበሪያዎችና የኢንተርኔት መስፋፋት አግዞታል፡፡

ሰዎች ረጃጅም ምስሎችን ከማየት፣ረዘም ያሉ ንግግሮችን ከመስማት፣ብዙ ገፅ የያዙ መፅሐፍትን ከማገላበጥ ርቀው የዘመኑ ቴክኖሎጂ ወደ አመጣው ጊዜ ቆጣቢና አጫጭር ነገሮች ላይ ማተኮራቸው ጥቅሙ እንዳለ ሆኖ ጉዳቱም ግን በዚያው ልክ ቀላል የሚባል እንዳልሆነ በጉዳዩ ላይ ጥናት ያደረጉ ባለሙያዎች እየተናገሩ ነው፡፡

በቅርቡ በተደረገ ጥናት ሰዎች አጫጭር ቪዲዮዎችን አብዝተው በማየታቸው ብቻ አዕምሮአቸው አንድ ነገር ላይ ትኩረት የማድረግ አቅሙን ወደ 47 ሰከንድ በማውረድ ትዕግስት የለሽ እና ችኩል ትውልድ እየፈጠረ ነው ተብሏል፡፡

አቶ ቴዎድሮስ ጌትዬ የሰዎች ስነ ባህሪ ጥናት ባለሞያ ናቸው፡፡ ባለሞያው ሰዎች በአጭር ቪድዮ የስነ ልቦና ተፅዕኖ ስር መግባታቸው፣ ኑሮአቸው ላይም ትኩረታቸውን በስራ ሂደት ላይ ሳይሆን በመጨረሻው ውጤት ላይ ብቻ በማድረግ ለለውጥ ሁሌም አቋራጭ መንገድን እንዲመርጡ ስነ ልቦናዊ ተፅዕኖ ያሳድርባቸዋል ይላሉ፡፡

የሰዎች ስነ ባህሪ ጥናት ባለሞያው አጫጭር ቪድዮዎችን ያለ ገደብ ማየት ለነገሮች ትኩረት የመስጠት እና የማስተዋል ችሎታን ይቀንሳል፣ ረጅም ፅሁፍ ማንበብ፣ በእርጋታ የሚከናወኑ ተግባራትን ለመከወን መሰላቸትን ያስከትላል ያሉን ሲሆን ዝርዝሮችን በቀላሉ ለማስታወስ መቸገር ያመጣል። የእንቅልፍ እና የዕረፍት ጊዜን ያዛባል ብለዉናል።

በቅርቡ በተደረገ ጥናት በአጫጭር ቪድዎች ሱስ መጠመድ የአልኮል ሱስ በአእምሮ ላይ ከሚያስከትለው ጉዳት ጋር ተመሳሳይ ነው ተብሏል፡፡

ይህንን ጉዳት ለመቀነስ ዕለታዊ የስክሪን ጊዜ ገደብን መወሰን፣ ጤናማ እና ትምህርታዊ የሆኑ ይዘቶችን መምረጥ፣ ስፖርት መስራት፣ መፅሃፍ ማንበብ፣ ከተፈጥሮ ጋር ጊዜ ማሳለፍ፣ ከወዳጆች ጋር መጨዋወት የመሳሰሉ ልምምዶችን ማዘውተር፣ ጤናማ የሆኑ የዲጂታል ልምምዶችን መከተል እንደሚያስፈልግ ባለሙያው መክረዋል።

ንጋት መኮንን

የሸገርን ወሬዎች፣ መረጃ እና ፕሮግራሞች ይከታተሉ…

📌 Telegram; https://t.me/ShegerFMRadio102_1

📌 YouTube: https://shorturl.at/P4mpX

📌 WhatsApp: https://tinyurl.com/ycxjmm3s