ሐምሌ 8 2017 - ወጋገን ካፒታል ኢንቨስትመንት ባንክ በኢትዮጵያ የሰነደ ሙዓለ ንዋዮች ገበያ ላይ በሀገሪቱ የመጀመሪያውን የግምጃ ቤት ሰነድ እና የሰነደ ሙዓለ ንዋዮች ግብይት ማከናወኑን ተናገረ።

ወጋገን ካፒታል ኢንቨስትመንት ባንክ የመንግስት የግምጃ ቤት ሰነድ እና የሰነደ ሙዓለ ንዋዮች ግብይት ሳደርግ ይህ ለመጀመሪያ ጊዜ ነው ሲል ለሸገር በላከው መግለጫ አስረድቷል። 

ኢንቨስትመንት ባንኩ ግብይቱን ያካሄደው ሀምሌ 4 ቀን 2017 ዓ.ም በሸራተን አዲስ ሆቴል በተዘጋጀው የመንግስት ግምጃ ቤት ሰነድ እና የሰነደ ሙዓለ ንዋዮች ግብይት ይፋዊ ማስጀመሪያ ስነስርዓት ላይ መሆኑንም አስረድቷል፡፡ 

የኢንቨስትመንት ባንኩ በዕለቱ በአይነቱ የመጀመሪያ የሆነውን እና በአገበያዮች መካከል የተከናወነውን የግምጃ ቤት ሰነድ እና የሰነደ ሙዓለ ንዋዮች ግብይት በተሳካ ሁኔታ በመፈጸም ለሃገሪቱ የካፒታል ገበያ እድገት ጉልህ አስተዋፅዖ እያደረኩ እገኛለሁ ብሏል።

በተጨማሪም ኢንቨስትመንት ባንኩ ከኢትዮጵያ የሰነደ ሙዓለ ንዋዮች ገበያ እና ማዕከላዊ የሰነደ ሙዓለ ንዋዮች ግምጃ ቤት ጋር በመተባበር ከሰኔ 11 ቀን 2017 ጀምሮ የሙዓለ ንዋዮችን እና የግምጃ ቤት ሰነዶችን የግብይት ትዕዛዝ ከመቀበል እስከ ባለቤትነት ማዛወር ያለውን ስራ በተሳካ ሁኔታ የቀጥታ የሙከራ ግብይቶችን ሲካሂድ ቆይቻለሁ ብሏል።

በአሁኑ ወቅት ወጋገን ካፒታል ኢንቨስትመንት ባንክ አዳዲስ የካፒታል ገበያ አማራጮች በማቅረብ ስራ ላይ እየበረታ እንደሆነ አስረድቷል።

ንጋቱ ሙሉ