ሐምሌ 28 2017 - የግል ከፍተኛ የትምህርት ተቋማት አባል የሆኑበት የአፍሪካ ቢዝነስ ስኩል ማህበር፤ በመጪው ዓመት ዓመታዊ ኮንፈረንሱን በኢትዮጵያ ያካሄዳል ተባለ፡፡

sheger1021fm
Aug 4
2 min read

የግል ከፍተኛ የትምህርት ተቋማት አባል የሆኑበት የአፍሪካ ቢዝነስ ስኩል ማህበር፤ በመጪው ዓመት ዓመታዊ ኮንፈረንሱን በኢትዮጵያ ያካሄዳል ተባለ፡፡

ኮንፈረንሱ የሚካሄደው የአፍሪካ ቢዝነስ ስኩል ማህበር ከክቡር ኮሌጅ ጋር በጋራ መሆኑን ሰምተናል፡፡

በዚህም በ2018 ዓ.ም የሚያሰናዳውን ዓመታዊ ኮንፈረንስ ኢትዮጵያ እንድታዘጋጅ ተመርጣለች የተባለ ሲሆን ዝግጅቱ በመጪው ዓመት ከግንቦት 12 እስከ 14 ቀን በአዲስ አበባ ይካሄዳል ተብሏል፡፡

ይህን የሰማነው የአፍሪካ ንግድ ትምህርት ቤቶች ማህበር ከክቡር ኮሌጅ ጋር በመሆን በተሰጡት መግለጫ ላይ ነው፡፡

በኮንፈረንሱ ከ150 በላይ የከፍተኛ ትምህርት ተቋማት፣ ዳይሬክተሮች እና የአለም አቀፍ አካዳሚክ መሪዎች ከመላው አፍሪካ እና ከዓለም አቀፍ ይሳተፋሉ ተብሎ ይጠበቃል፡፡

ከኢትዮጵያ ከፍተኛ የትምህርት ተቋማት ክቡር ኮሌጅ በማህበሩ ብቸኛ አባል ነው ተብሏል፡፡

ኮሌጁ ከ2 ዓመት በፊት የሚጠበቅበትን መስፈርት አሟልቶ ያቀረበዉ ጥያቄ ተቀባይነት አግኝቶ የ2026 የማህበሩ ዓመታዊ ጉባኤ በክቡር ኮሌጅ አዘጋጅነት ኢትዮጵያ እንድታካሄድ መመረጧን የኢትዮጵያ የግል ከፍተኛ ትምህርት ተቋማት ማህበር ስራ አስኪያጅ አቶ ተፈራ ገበየሁ ተናግረዋል፡፡

የአፍሪካ ቢዝነስ ስኩል ማህበር በ2018 ዓ.ም በወርሀ ግንቦት በኢትዮጵያ በሚያሰናዳው መርሃ ግብር ከትምህርት ሚኒስቴር፣ የቱሪዝም ሚኒስቴር፣ የውጭ ጉዳይ ሚኒስቴር እና የአዲስ አበባ ከተማ አስተዳደር ጋር በጋራ በመሆን ነው ተብሏል፡፡

እንዲህ አይነት ኮንፈረንስም በኢትዮጵያ እና በአፍሪካ/አለም አቀፍ ተቋማት መካከል የእውቀት ሽግግር እንዲኖር፣ በምርምር፣ በፈጠራ፣ በፋኩልቲ ልማት እና በስራ ፈጠራ ውስጥ ስትራቴጂካዊ አጋርነት እንዲፈጠር ያደርጋል ያሉት አቶ ተፈራ በተጨማሪም የኢትዮጵያን የንግድ ተቋማት ከከፍተኛ ትምህረት ተቋማት ጋር በጋራ የሚሰሩበትን አጋጣሚ መፍጠርን ጨምሮ የኮንፍረስ ቱሪዝም ተጠቃሚነት እንዲያድግ ያደርጋል ተብሎ ተስፋ እንደተጣለበት ተናግረዋል፡፡

ክቡር ኮሌጅ ላለፉት 20 ዓመታት በትምህርት ስራ ውስጥ የቆየ መሆኑ የተነገረ ሲሆን ላለፉት 4 ዓመታት ደግሞ የኮሌጅ ስራ ሲሰራ ቆይቷል ተብሏል፡፡

የትምህርት ጥራትን ከማሻሻል አንፃር በአፍሪካ ውስጥ ካሉ ከፍተኛ ጥራት ያላቸው ከፍተኛ የትምህርት ተቋማት ልምድ ለመውሰድ የሚያግዘው አንደኛው መንገድ የአፍሪካ ቢዝነስ ስኩል ማህበር አባል መሆን ነው ያሉት ደግሞ የኮሌጁ ስራ አስኪያጅ አቶ ደሳለኝ መኩሪያ በዚህም ክቡር ኮሌጅ ወደ ስራ ከገባበት ዓመት ጀምሮ በማህበሩ መታቀፉን ተናግረዋል፡፡