ሐምሌ 27፣2016 - ባንኮች ከሚገዙበትና ከሚሸጡበት ይፋዊ የምንዛሬ ዋጋ ውጭ በተጨማሪነት ኮሚሽን እና ሌሎች ክፍያዎችን ለብቻ ማስከፈል እንዲያቆሙ ተወሰነ፡፡

#የኢትዮጵያ_ብሔራዊ_ባንክ_የዳይሬክተሮች ቦርድ ባንኮች ይፋ ከሚያደርጉት የውጭ ምንዛሬ መግዣና መሸጫ ዋጋ ውጭ የሚያስከፍሉትን ኮሚሽን እና ሌላ ክፍያ እንዲያቆሙ መወሰኑ ተሰምቷል፡፡

እንዲህ ያሉ ክፍያዎችን ካስከፈሉ እንኳን ከመግዣና መሸጫ ዋጋው ጋር አካተው አንድ ላይ ለደንበኞቻቸው ይፋ እንዲያደርጉት መወሰኑን ከብሔራዊ ባንክ ያገኘነው መረጃ ያሳያል፡፡

ይህም #የውጭ_ምንዛሬ ግዥና ሽያጭ ላይ ግልፅነትን ለመፍጠር ያለመ ነው ተብሏል፡፡

ስለ ጉዳዩ ሸገር የጠየቃቸው የምጣኔ ሐብት ባለሙያ ውሳኔው ለባንክ ደንበኞች የሚበጅ ነው ብለዋል፡፡

ይህን ሲያስረዱም የአንዳንድ ምግብ ቤቶችን የዋጋ ዝርዝር እንደ ምሳሌ ያነሳሉ፡፡

ሂሳብ ሲያስከፍሉ የምግብ መዘርዘሩ ላይ ከተቀመጠው ዋጋ በላይ የሚጠይቁ አሉ ለዚህም ምክንያቱን ሲጠየቁ የምግብ መዘርዝሩ ላይ የሰፈረው ዋጋ ቫትን አይጨምርም ይላሉ፡፡

ይህ ለደንበኞች ግልፅነት የጎደለው ወይም መጀመሪያውኑ አጠቃላይ ዋጋውን አይተው እንዳይወስኑ የሚያደርግ ነው ብለዋል፡፡

አሁን ባንኮች የውጭ ምንዛሬ ሲሸጡና ሲገዙ የሚያስከፍሉት ኮሚሽን እና ሌላ በፐርሰንት የሚሰላ ክፍያ ካለ ይፍ በሚያደርጉት የመግዣና መሸጫ ላይ እንዲያካትቱ መወሰኑም ደንበኞች ይፋ ከተደረገው ዋጋ ሌላ ክፍያ ስለማይጠይቁ አሰራሩን ግልፅ ያደርገዋል ብለዋል ባለሞያው፡፡

በሌላ በኩል ግን ይህ አሰራር ደንበኞች ከውጭ ግዢ ለመፈፀም LC ለመክፈት ሲጠይቁ የሚኖረውን ግብይት አይመለከትም ተብሏል፡፡

ውሳኔው ከዛሬ ጀምሮ ስራ ላይ መዋል መጀመሩንም ብሔራዊ ባንክ እወቁልኝ ብሏል፡፡

ትዕግስት ዘሪሁን