ኢትስዊች ኢትዮ-ፔይ(EthioPay) ሲል የሰየመውን ብሔራዊ የዲጂታል ክፍያ መለያ ይፋ አደረገ፡፡

ታህሳስ 10/2018

ኢትስዊች ኢትዮ-ፔይ(EthioPay) ሲል የሰየመውን ብሔራዊ የዲጂታል ክፍያ መለያ  ይፋ አደረገ፡፡

ኢትዮ-ፔይ ሁሉንም የኢትስዊች ተናባቢ የዲጂታል ክፍያ አገልግሎቶች በአንድ ማንነት ስር የሚያሰባስብ እና በፋይናንስ አገልግሎት አቅራቢ ተቋማት በኩል ለደንበኞች ከፊት የሚታይ የብራንድ መለያ ነው ተብሏል።

ኢትዮ-ፔይ በርካታ የክፍያ አገልግሎቶችን ለማቀፍ የተነደፈ ብራንድ መሆኑ ትናንት ይፋ በተደረገበት ስነስርዓት ላይ ተነግሯል፡፡

በዲጂታል የክፍያ ሥርዓት ውስጥ ደህንነቱ በተጠበቀ እና በቅጽበት የዲጂታል ክፍያዎችንም ሆነ የገንዘብ ዝውውር የሚያንቀሳቅስ ብቸኛ የጋራ የዲጂታል መስመር  ሆኖ የሚያገለግል ነው ተብሏል።

በዋናነት ኢትዮ-ፔይ ገንዘብን በቅጽበት ማንቀሳቀስ ብቻ ሳይሆን የፋይናንስ እና ሌሎች ተቋማትን እንዲሁም ደንበኞችን በአንድ ብራንድ ተጠቃሚ እንዲሆኑ ያደርጋቸዋል ተብሎለታል፡፡

 ለፋይናንስ ተቋማት ኢትዮ-ፔይ የጋራ የዲጂታል መሰረተ ልማት  ላይ ተናባቢ፣ ዘርፈ ብዙ እና ደህንነቱ የተጠበቀ አገልግሎት መስጠት እንዲችሉ የሚያደርግ መለያ (Brand) ነው፡፡

ለአገልግሎት ሰጪ ተቋማት  ክፍያ መቀበልን የሚያቀልል፣ መተማመንን የሚገነባ ፤ለአገልግሎት ተጠቃሚው የየትኛውንም የፋይናንስ ተቋም አገልግሎት እንዲጠቀሙ የሚያስችል አንድ መለያ  ነው ሲሉ የኢትስዊች የቦርድ ሰብሳቢው አቶ ሰለሞን ደስታ ተናግረዋል።

አቶ ሰለሞን ሁሉም የፋይናንስ ተቋማት የኢትዮ-ፔይ  መለያን በፍጥነት በአገልግሎት መዳረሻዎቻቸው  ውስጥ እንዲያካትቱ እና ከደንበኞቻቸው  ጋር በሚኖራችው የግብይት እንቅስቃሴ ውስጥም ግንባር ቀደም አድርገው እንዲተገብሩት አሳስበዋል፡፡

ሙሉ ዘገባውን ለማድመጥ…..

ንጋቱ ሙሉ