ሐምሌ 19 2017 - አቢሲኒያ ባንክ ሙሉ በሙሉ ወረቀት አልባ በሆነ መልኩ የባንክ አገልግሎት መስጠት ጀመርኩ አለ።

ይህ ወረቀት አልባ የባንክ አገልግሎት ዘመናዊ የባንክ አሠራሮችን እንዲይዝ ተደርጎ በአዲስ መልክ በባንኩ ራስ ልዩ ቅርንጫፍ (Ras Premium Branch) በዛሬው ዕለት በተከናወነ ይፋዊ የምርቃት ሥነ-ሥርዓት አገልግሎቱን መስጠት ጀምሯል።

በዚህ አዲስ አሠራር ደህንነቱ የተጠበቀ ፈጣን አገልግሎት ለመስጠት ያስችለኛል ያለው #አቢሲኒያ_ባንክ ገንዘብ ማስተላለፍ፣ ጥሬ ገንዘብ ማስገባትና ማውጣት፣ ሒሳብ መክፈትና ሌሎች ከቅርንጫፍ አገልግሎት ጋር የተገናኙ ማናቸውንም አገልግሎቶች ደንበኞች ራሳቸው ወይም በባንኩ ሠራተኞች በመታገዝ መጠቀም ይቻላሉ ብሏል።

አገልግሎቱ የጣት አሻራንና የፊት ገጽን እንደ መለያ የሚጠቀም መሆኑ የተነገረ ሲሆን ጊዜ የሚወስዱ የአሠራር ሂደቶችን ይቀንሳል ተብሎ ተስፋ ተጥሎበታል።

ይህን አዲስ ወረቀት አልባ የባንክ አገልግሎት በኢትዮጵያ ባሉ በሁሉም ቅርንጫፎች ለመስጠት ቅድመ ዝግጅት ተደርጓል ተብሏል።

አገልግሎቱ የእንግሊዝኛ ቋንቋን ጨምሮ በተለያዩ ሀገራዊ የቋንቋ አማራጮች ማለትም በአማርኛ፣ በአፋን ኦሮሞ፣ በሱማሌኛ፣ በትግርኛ፣ በአፋርኛ እና በሲዳምኛ የቀረበ እንደሆነ ተናግሯል።

የንግዱ ማህበረሰብ እንዲሁም ግለሰቦች በቅርንጫፍ ውስጥ ወረፋ መጠበቅ ሳያስፈልጋቸው የጥሬ ገንዘብ መቀበያና መክፈያ (Recyclers) እና በመጠኑ ከፍተኛ የሆነ ገንዘብን ለመቀበል የሚያስችሉ ማሽኖች (Bulk Deposit Machines) በተመረጡ ቅርንጫፎች ማዘጋጀቴን እወቁልኝ ብሏል ባንኩ፡፡

የአቢሲኒያ ባንክ ይህ አሰራት ወደፊት በሁሉም ቅርንጫፎች ተደራሽ ለማድረግ እየሰራ እንደሚገኝ፤ የባንኩ ዋና ስራ አስፈፃሚ በቃሉ ዘለቀ አስረድተዋል፡፡

በመድረኩ ላይ የተገኙት የብሔራዊ ባንክ ገዢ አቶ ማሞ ምህረቱ፤ አቢሲኒያ ባንክ ይህንን ቴክኖሎጂ ማስጀመሩ የሚበረታታ ነው ብለዋል።

ማርታ በቀለ

የሸገርን ወሬዎች፣ መረጃ እና ፕሮግራሞች ይከታተሉ…

📌 Telegram; https://t.me/ShegerFMRadio102_1

📌 YouTube: https://shorturl.at/P4mpX

📌 WhatsApp: https://tinyurl.com/ycxjmm3s