ነሐሴ 20፣2016 - የታላቁ የኢትዮጵያ ሕዳሴ ግድብ ሁለት ተርባይኖች ስራ መጀመራቸውን ጠቅላይ ሚኒስትር ዐቢይ አህመድ ተናግረዋል

የታላቁ የኢትዮጵያ ሕዳሴ ግድብ ሁለት ተርባይኖች ስራ መጀመራቸውን ጠቅላይ ሚኒስትር ዐቢይ አህመድ ተናግረዋል።

ስራ መጀመራቸውን የተነገረው እነዚህ ተርባይኖች ለግድቡ 3ኛ እና 4ኛ ተርባይኖች ናቸው።

ሌሎቹ ዩኒቶች በተቀመጠላቸው እቅድ መሰረት በመከናወን ላይ እንደሚገኙም ጠቅላይ ሚኒስትሩ በማህበራዊ የትስስር ገፃቸው ላይ አስረድተዋል።

የወንዝ ፍሰት ሳይስተጓጎል እንደቀጠለም ጠቅሰዋል።

''የግድቡ የውሃ ማስተንፈሻ በሮች ተከፍተው ተጨማሪ 2,800 ሜኪ ውሃ በሰከንድ ማፍሰስ ጀምረዋል'' ብለዋል።

''የግድብ የውሃ ፍሰትን በመቆጣጠር፣ የጎርፍ አደጋ ስጋትን በመቀነስ፣ ለታችኛው ተፋሰስ ሀገራት በተለይ በድርቅ ዘመን መጠኑ ያልዋዠቀ የውሃ አቅርቦት እንዲደርሳቸው ያደርጋል'' ሲሉም ጠቅሰዋል።

''ይህ የተመዘነና የተመጣጠነ የውሃ ልቀት ግብርናን፣ የኃይል የማመንጨት ሥራን፣ በቀጠናው ያለ የሀብት አጠቃቀም ምጣኔን ለማጎልበት ጠቃሚ ነው'' በማለት ጠቅላይ ሚኒስትሩ አስረድተዋል።