ሚያዝያ 29 2017 - ታሪክን የኋሊት ናዚዎች ዓለምን የማስገበር እና በስራቸው አዳሪ የማድረግ ምኞታቸው የወደቀበት ቀን

የጀርመን ናዚዎች ዓለምን የማስገበር እና በስራቸው አዳሪ የማድረግ ምኞታቸው ፀሀይ እንዳገኘው ጤዛ ተንኖ ሰራዊታቸው በተሸናፊነት እጅ የሰጠው የዛሬ 80 ዓመት በዛሬዋ ዕለት ነው፡፡

የጀርመን ናዚዎች በአውሮፓ የ2ኛው የዓለም ጦርነት ከማብቃቱ ከ6 ዓመታት ገደማ በፊት ፖላንድ በመውረር የጥፋት ተልዕኳቸውን አሟሹ፡፡

ከዚህ አስቀድሞም የቀድሞዋን ቼኮቭሎቫኪያ ሱዴትን ግዛት ወደራሳቸው አድርገዋል፡፡

ናዚዎቹ በዚህ ብቻ አልጠረቁም፡፡

ቀስ በቀስ ብዙዎቹን የአውሮፓ አገሮች የወረራቸው ሰለባ አደረጓቸው፡፡

ፈረንሳይም ከናዚዎቹ የጥፋት ዘመቻ አላመለጠችም፡፡

የናዚዎቹ ወረራ እስከ ሩሲያዋ ርዕሰ ከተማ ሞስኮ በራፍም የተቃረበ ነበር፡፡

ናዚዎቹ ለጥፋት ዘመቻቸው ከጣሊያን ፋሽስቶች እና ከጃፓን ተስፋፊዎች ተሻረኩ፡፡

ይሄ የጥፋት ቁርኝት የአክሲስ ሀይል ተባለ፡፡

በአንፃሩ አሜሪካ ፣ ብሪታንያ ፣ የቀድሞዋ ሶቪየት ህብረት የህብረቱ እና የጦር ተባባሪዎቻቸው ሀይሎች ተብለው እነ ናዚ ጀርመንን ለመመከት ተቆራኙ፡፡

በጦርነቱ አጋማሽ የውጊያው ገፅታ መለወጥ ያዘ፡፡

የቀድሞዋ ሶቪየት ሕብረት ጦር የናዚዎቹን ሀይል በስታሊንግራድ ማንኮታኮቱ የናዚዎቹ ጀምበር እየጠለቀች ለመምጣቷ ቀዳሚው ምልክት ሆነ፡፡

የህብረቱ ሀይሎች በሰሜናዊ ፈረንሳይ ኖርማንዲ በአየር እና ባህር ወለድ ዘመቻ የናዚን አከርካሬ መምታታቸው የመጨረሻው መጀመሪያ ሆነ፡፡

ከዚህ በኋላ ናዚዎቹ አቅምም ፣ ጊዜም ፣ ወኔም እየከበዳቸው መጣ፡፡

በሽንፈት ላይ ሽንፈት ተደራረበባቸው፡፡

የህብረቱ ሀይሎች ከየአቅጣጫው ያሳድዷቸው ያዙ፡፡

የናዚ ሰራዊት ወደ አገሩ ቢሸሽም አገሩ መሸሻ ልትሆነው አልቻለችም፡፡

ከየአቅጣጫው የህብረቱ ሀይሎች ከበቡት፡፡

የእነ አሜሪካ እና ብሪታንያ ሀይሎች ከምዕራብ ፣ የቀድሞዋ ሶቪየት ህብረት ሰራዊት ደግሞ ከምስራቅ አቅጣጫ መፈናፈኛ አሳጡት፡፡

የጀርመን ከፍተኛው ወታደራዊ እዝ የዛሬ 80 ዓመት በዛሬዋ ዕለት ያለ ምንም ቅድመ ሁኔታ እጅ ለመስጠት ተገደደ፡፡

በእጅ መስጫው ሰነድ ላይም በፈረንሳይ ሪምዝ የናዚዎቹ ጦር የዘመቻ መመሪያ የበላይ ጄኔራል አልፍሬድ ዮደ ፊርማውን አኖረበት፡፡

ሆኖም የቀድሞ ሶቪየት ህብረት ለቀዳሚው እጅ መስጫ ሰነድ እውቅና መስጠት ባለመፍቀዷ በማግስቱ የጀርመን መንግስት መቀመጫ በነበረችው በርሊን በህብረቱ ሀይሎች የጦር አዛዦች እና በጀርመናዊው ፊልድ ማርሻል ዊል ሔልም ካይትል መካከል የናዚዎች 2ኛ እጅ መስጫ ሰነድ መፈረሙ በታሪክ ሰፍሮ ይገኛል፡፡

በዚህም በአውሮፓ የ2ኛው የዓለም ጦርነት መደምደሚያ ሆነ፡፡