መጋቢት 12 2017 - ኢትዮጵያ የጨረር ህክምና የኒውክለር የህክምና ቴክኖሎጂን ማስፋፋት እንዳለባት ተነግሯል

የካንሰር ህመም ከጤና ችግርነቱ ባለፈ ለህክምና በሚጠይቀው ወጪ እና ረዘም ያለ ጊዜ ምክንያት የዜጎችን ኪስ እየፈተነ የሀገርንም ኢኮኖሚ ይጎዳል፡፡

ኢትዮጵያ ለ #ካንሰር_ህክምና የሚውለውን የጨረር ህክምና ለማድረግ የሚያግዘውን ግብዓት በውጭ ምንዛሪ ገዝታ ነው የምትጠቀመው፤ ይህም ህክምናው ብዙ ገንዘብ እንዲጠይቅ አድርጎታል ተብሏል፡፡

ለዚህም መፍትሄ የተባለው ሀገሪቱ የጨረር ህክምና እንዲሁም ሌሎች ለምርመራ የሚሆኑ ሥራዎችን ለመስራት የኒውክለር የህክምና ቴክኖሎጂን ማስፋፋት እንዳለባት ተነግሯል።

የኒውክለር የህክምና ቴክኖሎጂ ካንሰር በሰውነት ውስጥ ሳይሰራጭ ገና ከጅምሩ ለማወቅ የሚደረጉ ምርመራዎችን እንዲሁም ከተከሰተ በኋላም ለህክምና ጥቅም የሚሰጥ መሆኑን የሚናገሩት በአዲስ አበባ ዩኒቨርሲቲ ህክምና ሳይንስ ኮሌጅ ኒውክለር ፋርማሲስት እና መምህር የሆኑት ዶክተር ዮሃንስ ጆርጌላጌቦ ናቸው፡፡

በአሁኑ ጊዜ አለምን በከፍተኛ ደረጃ እያስፈራ ያለው ካንሰር ህክምናን ገና በሰውነት ውስጥ ሳይስፋፋና ሳይሰራጭ ለማከም አንደኛው መላ የኒኩለር ቴክኖሎጂ ነው ብለዋል፡፡

የካንሰር ህሙማንም እየተጎዱ በመሆኑ ወደፊት ቴክኖሎጂው በሚስፋፋበት ጊዜ ስራውን እንደሚያሻሽለው ተናግረዋል፡፡

#የኒውክለር_ህክምና ቴክኖሎጂን ሌሎች ሀገራት በስፋት እንደሚጠቀሙበት የሚናገሩት ዶክተር ዮሐንስ በኢትዮጵያ ስራው ቢጀመር ለካንሰር ህክምና የሚወጣውን ውጪ የሚቀንስና አገልግሎቱም ለብዙዎች እንዲዳረስ ያግዛል ይላሉ፡፡

ለካንሰር ህክምና የኒውክለር ቴክኖሎጂን ለመጠቀም የቅዱስ ጳውሎስ ሆስፒታል እያካሄደ ባለው የካንሰር ህክምና ማዕከል ግንባታው ቴክኖሎጂውን ወደ ስራ ለማስገባት በሂደት ላይ መሆኑ ተነግሯል፡፡

ዶክተር እጅጉ ከበደ የሜዲካል ፊዚስት ስፔሻሊስት ናቸው እርሳቸው እንደሚናገሩት የኒውክለር የህክምና ቴክኖሎጂ ለካንሰር ህክምናና ምርመራ ስራ ላይ ቢውል በብዙ የሚጠቀምነው፡፡

የኒውክለር የህክምና ቴክኖሎጂ በሌሎች የምርመራ መሳሪያዎች የማይታዩና በሰውነቱ ውስጥ ተደብቀው የሚገኙ የካንሰር ቅንጣቶችን በመለየት በጊዜ ለማወቅና ለማከም የሚያግዝ ነው ተብሏል፡፡

በኢትዮጵያ በየአመቱ ከ60 ሺህ በላይ ሰዎች በተለያየ ዓይነት ካንሰር የሚያዙ ሲሆን ከ44 ሺህ በላይ የሚሆኑት ደግሞ ህይወታቸውን ያጣሉ፤ የጡት እና የማህፀን ጫፍ ካንሰር ዓይነቶች ደግሞ ከፍተኛውን ቁጥር እንደሚይዙ የዓለም የጤና ድርጅት መረጃ ያሳያል፡፡

ሙሉ ዘገባውን ያድምጡ… https://0fj.cc/1WB1p9ZDH54

ምህረት ስዩም

የሸገርን ወሬዎች፣ መረጃ እና ፕሮግራሞች ይከታተሉ…

📌 YouTube: https://tinyurl.com/ky57kspd

📌 WhatsApp: https://tinyurl.com/ycxjmm3s

📌 Tiktok: https://bit.ly/44Dd6Il