መጋቢት 10 2017 - እርዳታን ለማይመለከተው ሰው ጥቅም ላይ እንዲውል ያደረገ ግለሰብ እስከ 25 ዓመት በሚደርስ እስራት እንዲቀጣ የሚደነግገው ረቂቅ አዋጅ ለቋሚ ኮሚቴ ተመራ

የሰብአዊ እርዳታን ለራሱ ወይም ለማይመለከተው ሰው ጥቅም ላይ እንዲውል ያደረገ ግለሰብ ከ10 እስከ 25 ዓመት በሚደርስ ጽኑ እስራት እንዲቀጣ የሚደነግገው የአደጋ ስጋት ስራ አመራር ረቂቅ አዋጅ ለቋሚ ኮሚቴ ተመራ፡፡

በስራ ላይ ያለው ብሔራዊ አደጋ ስጋት ስራ አመራር ኮሚሽን ማቋቋሚያ ደንብ ግልጽነትን እና ተጠያቂነትን ለማረጋገጥ አላስቻለም ተብሏል፡፡

አሁን በስራ ላይ ነው የተባለው ደንብ ኢትዮጵያ ተቀብላ ካፀደቀቻቸው አለም አቀፍ ስምምነቶች እና አሰራሮች ጋር የሚጣጣም አይደለም ተብሏል፡፡

በትናንትናው እለት የህዝብ እንደራሴዎች ምክር ቤት ለውጭ ግንኙነት እና ሰላም ጉዳዮች ቋሚ ኮሚቴ የመራው የአደጋ ስጋት ስራ አመራር ረቂቅ አዋጅ እነዚህን ችግሮች የሚፈታ ድንገተኛ አደጋ ሲከሰትም የአስቸኳይ ጊዜ አዋጅን ተግባራዊ ለማድረግ እንደሚያስችል ተነግሯል፡፡

ረቂቅ አዋጁ የሰብአዊ እርዳታ ለተረጂዎች እንዳይደርስ ያደናቀፈ ወይም የከለከለ ሰው እስከ አስር ዓመት ጽኑ እስራት እንዲቀጣ የሚደነግግ ነው፡፡

የሰብአዊ እርዳታን ለራሱ ወይም ለማይመለከተው ሰው ጥቅም ላይ እንዲውል ያደረገ ግለሰብ የተዘረፈውን ንብረት ማስመለሱ እንደተጠበቀ ሆኖ ከአስር እስከ ሃያ አምስት ዓመት በሚደርስ ጽኑ እስራት እና አንድ ሚሊዮን ብር በሚደርስ የገንዘብ መቀጮ እንዲቀጣ ያዛል፡፡

የሰብአዊ እርዳታን ድጋፍ ለማግኘት ሀሰተኛ መረጃ ወይም የተጋነነ ጥያቄ ያቀረበ፣ አደጋ ሳይኖር አደጋ እንዳለ አድርጎ የእርዳታ ጥያቄ ያቀረበ እንደሆነ ከሶስት ዓመት በማያንስ እና ከአምስት ዓመት የማይበልጥ ቀላል እስራት እና 15 ሺህ ብር እንዲቀጣ የሚያዝ ረቂቅ አዋጅ ነው፡፡

ሙሉ ዘገባውን ያድምጠ….

ያሬድ እንዳሻው

የሸገርን ወሬዎች፣ መረጃ እና ፕሮግራሞች ይከታተሉ…

📌 YouTube: https://tinyurl.com/ky57kspd

📌 WhatsApp: https://tinyurl.com/ycxjmm3s

📌 Tiktok: https://bit.ly/44Dd6Il

📌 Linkedin : https://tinyurl.com/yhycs5r