ማስታወቂያ

programs top mid size ad

ታሪክን የኋሊት/ የዛሬ 84 ዓመት፣ የካቲት 12 ለኢትዮጵያ የፅልመት ቀን ነበር

የዛሬ 84 ዓመት፣ የካቲት 12 ለኢትዮጵያ የፅልመት ቀን ነበር፡፡ 

የስቃይና የመከራ ውርጅብኝ በኢትዮጵያዊነታቸው ብቻ የተቀበሉበት ቀን ነበር፡፡ 

1929 የካቲት 12 ቀን፣ የዋለው አርብ ነበር፡፡ 

የኢጣሊያው ልዑል ልጅ በመውለዱ፣ ለልደቷ ክብር፣ ለድሆች ምፅዋት ይሰጣል፤ ተብሎ ተለፈፈ፡፡ 

በዛሬው የአዲስ አበባ ዩኒቨርስቲ በዚያን ጊዜው ገነት ልዑል ቤተ-መንግሥት፤ ድሆችና ታዋቂ የከተማ ነዋሪዎች ተጠርተዋል፡፡ 

ሰዓቱ በግምት ከረፋዱ 4፡00 ይሆናል፡፡ 

ለዝንተዓለም በባዕድ ተገዝታ የማታውቀው ኢትዮጵያ፤ ክብሩዋ ተገሶ፣ ወሰኗ ተደፍሮ፣ በፋሰሽት ኢጣሊያ መወረሩዋ እንደ እግር እሳት የሚያንገበግባቸው ሁለቱ ወጣቶች አበርሃ ደቦጭና ሞገስ አስገዶም፣ በዚያው ቤተ-መንግሥት ተገኝተዋል፡፡ 

ሁለቱ ጓደኛሞች ከአጣሊያኖች ጋር የሚሰሩ እንደመሆናቸው በቤተ-መንግሥቱ መገኘታቸው የተለመደ ነው፡፡ 

ያልተለመደው፣ ያንለት እዚያ የተገኙት፣ ለተለየ ተልኮ መሆኑ ነበር፡፡  

ጄኔራል ሮደልፎ ግራዚያኒ፣ በተገኘበት በቤተመንግሥቱ በር ፊት ለፊት፣ ለድሆች ምፅዋት መስጠት ተጀመረ፡፡ 

አካል ጉዳተኞች ግቢውን ሞልተውታል፡፡ 

አብርሃም ደቦጭና ሞገስ አስገዶም፣ ከሚስጥር ተካፋየቻቸው ከእነ ሰምኦን አደፍርሰና በሻህ ውረድ፣ ከበጅሮንድ ለጥይበሉ ጋር ሆነው የወሰኑትን፣ የቦምብ ጥቃት የመጣል እቅድ ለመፈፀም ያቺን ቀን መረጠዋል፡፡ 

ግራዚያኒና ሌሎች ጄኔራሎች ወዳሉበት አከታትለው የእጅ ቦንብ ወረወሩ፡፡ 

ቤተ-መንግሥቱ ቀውጢ ሆነ፡፡ 

በአንድ ጊዜ ሁሉም ነገር ተደበላለቀ፡፡ 

ግራዚያኒ በቀላሉ ጉዳት ገጠመው፡፡ 

የአየር ሃይል አዣዡ፤ ግብፃዊው ጳጳስ አቡነ ቄርሎስና ሌሎች በፅኑ ቆሰሉ፡፡ 

የኢጣሊያ ሹማምንት ከቦንቡ ፍንዳታ በኋላ፤ ከድንጋጢያቸው ሲነቁ መትረየሳቻቸውን በቤተ-መንግስቱ ዙሪያ በነበሩት፣ ኢትዮጵያዊያን ላይ ሁሉ ተከሱባቸው፡፡

ሬሳ በሬሳ ላይ ተነባበረ፡፡ 

ከዚያ በኋላ የኢጣሊያ ወታደሮች ማንኛውንም ኢትዮጵያኑ በያለበት እንዲገድሉ ጥብቅ ትዕዛዝ ተሰጣቸው፡፡ 

የፋሽስት ኢጣሊያ ወታደሮች ከቤተ-መንግሥቱ ጀምረው በሁሉም አቅጣጫ ተሰማርተው ማንንም ሳይመርጡ ኢትዮጵያኖችን ፈጇቸው፡፡ 

ጥፋተኛ ስለሆነ ሳይሆን ኢትዮጵያዊ ከሆነ ይገደላል ወይም በአካፋና በዶማ ይቀጠቀጣል ወይም መኪና ይነዳበታል፡፡ 

አገዳደሉ እጅግ አረመኒያዊ ነበር፡፡ 

በጥይትና በሳንጃ ከሚገድሉት በስተቀር ሕፃናትን ሳይቀር በቤት ውስጥ እየዘጉ አነደዳዋቸው፡፡ 
መንገዱ በደም ጐርፍ ታጠበ፡፡ 

የታሰሩትንም በጥይት ጨፈጨፏቸው፡፡

በመኪና እጅና እግራቸውን እየጉተቱ አስቃዩዋቸው፡፡ 

3 ቀንም እንደዚህ ሆነ፡፡ 

ቆስሎም ሆኑ ተገርፎ፣ ነፍሱ የቆየው ለ3 ቀናት አንድ ጉንጭ ውሃ አንዲት ቁራሽ ጉርሻ አላገኘም፡፡ 

በረሃብና በጥም አለቀ፡፡ 

የፋሸሸቶች ልዩ ባህሪ በሆነው ጭካኔ እስከ 30,000 የሚደርሱ ኢትዮጵያውያን በ3 ቀን ተፈፀሙ፡፡  

በጊዜው የተማሩና ከጦር ሜዳ የተማሩኩ ወጣቶችንም አስቃይተው ገደሏቸው፡፡ 

አብርሃና ሞገስ ፣ በግርግሩ ውስጥ አምልጠው ወደ አርብኞች ተቀላቀሉ፡፡ በመጨረሻ ወደ ሱዳን ለመሄድ ጠረፍ ላይ ሲደርሱ ፣ በኢጣሊያኖች ተይዘው ተገደሉ፡፡ 

ሰምኦን አደፍርስና በሻህ ውረድንም፣  ጥፍራቸውን እየነቀሉ ፣ አስቃይተው ገደሏቸው፡፡

በ1933 ዓ/ም ኢትዮጵያ ነፃነቷን ካገኘች በኋላ፤  የነአብርሃምና በአዲስ አበባ ያለቁት ኢትዮጵያውያን አፅማቸው ተለቅሞ በቅድስት ስላሴ ካቴድራል እንዲያርፍ ተደርጓል፡፡ 

ሙሰሊኒም  በገዛ ዜጐቹ ከነሚስቱ ተገድሎ አስከሬኑ ተዘቅዝቆ ተሰቀለ፡፡
 
ግራዚያኒም ከማዕረጉ ወርዶ ታሰረ፡፡

ቁልፍ ቃላት
ምላሽ