• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር ወሬዎች እና ልዩ ወሬዎች

የፍሬገነት ህልም … ፍሬገነት ኪዳን ለሕፃናት ትምህርት ቤት….

የወጣት ፍሬገነት የዘወትር ህልም በችግር ምክንያት የትምህርት ቤትን ደጃፍ መርገጥ ያልቻሉ ሕፃናትን የሚያስተምር ትምህርት ቤት መክፈት ነበር፡፡ የዛሬ 15 ዓመት፣ በ1995 ዓ.ም አንዲት ዕለት ግን ይህን ሕልም ሊያጨናግፍ ያለ ክስተት ሆነ - በወቅቱ በሚኒያፖሊስ ከተማ ነዋሪ የነበረችው ፍሬገነት የምታሽከረክረው መኪና ከፖሊስ ከሚሸሽ እፅ አዘዋዋሪ መኪና ጋር ተጋጭቶ ፍሬገነት ለሕልፈተ በቃች…

ፍሬገነት በአደጋው ከዚህ ዓለም በሞት ስትለይ የዩኒቨርሲቲ ትምህርቷን አጠናቃ ገና ሁለት ወሯ ነበር፡፡ ብቸኛ ልጃቸውን በሞት የተነጠቁት ወላጆች ግን የፍሬገነትን ሕልም እውን ለማድረግ ተነሱ፡፡

ለዚህም የዛሬ 13 ዓመት የፍሬገነት ወላጆች 30 የችግረኛ ቤተሰብ ልጆችን የሚያስተምረውን “ፍሬገነት ኪዳን ለሕፃናት ትምህርት ቤት”ን አቋቋሙ…አሁን ላይ ትምህርት ቤቱ 335 ልጆችን የትምህርት ቁሳቁስ እየሰጠ፣ ዩኒፎርም እያለበሰ እና እየመገ ያስተምራል! ትምህርት ቤቱ ከመዋዕለ ሕጻናት እስከ 4ኛ ክፍል የሚያስተምር ሲሆን፤ ከዚያን በኋላ ያሉትን ክፍሎች ምግብ ማብላቱም ሆነ የትምህርት ቁሳቁስ ድጋፉ ሳይለይ በመንግሥት ትምህርት ቤቶች እንዲማሩ ያደርጋል…

 

በተለያዩ በጎ ፈቃደኛ ድርጅቶችና ግለሰቦች፣ በአሜሪካ በሚገኙ ኢትዮጵያውያን እርዳታና Global Fund for Children በተባለ ድርጅት ድጋፍ የሚንቀሳቀሰው ትምህርት ቤቱ የበጎ አድራጊዎችን ድጋፍ እሻለሁ ብሏል…ለአንድ ልጅ በወር 25 ዶላር ያህል ይፈጅብናል የሚለው ድርጅቱ ትምህርት ቤቱ የሚገኝበት ጊቢ ኪራይ መጨመሩን በመግለፅ የበጎ አድራጊዎችን ድጋፍ እንደሚፈልግ ለሸገር ተናግሯል፡፡

በወር 9 ሺ ብር ኪራይ ይከፍል የነበረው ትምህርት ቤቱ አሁን ላይ ኪራዩ በወር ወደ 12 ሺ ብር ከፍ እንዳለበት ይናገራል፡፡ የፍሬገነት አባት እና የትምህርት ቤቱ መስራችና አስተዳዳሪ የሆኑት ነዋሪነታቸው በአሜሪካ የሆነው አቶ ታፈሰ ውብሸት፣ ሁሉም ባለው አቅሙ፣ እውቀቱና ጉልበቱ ይርዳን ይላሉ፡፡ “ወጣት ተማሪዎች ተማሪዎቻችንን ቢያስጠኑልን፣ ዳቦ ቤት ያለው ለተማሪዎቹ የምናበላው ዳቦ … የፅሕፈት መሳሪያ የሚሸጠውም ደብተርና እስክሪብቶውን ቢለግሰን…” ሲሉ ጥሪ አቅርበዋል፡፡

ትምህርት ቤቱ መንግሥትን ቦታ እንዲሰጠው ከ7 ዓመታት በፊት ጠይቆ ምላሽ እየተጠባበቀ ነውም ብለዋል…

ትምህርት ቤቱን መደገፍ የምትሹ በ0114 67 44 81 ላይ በመደወል ወይም የፍሬገነት አባትና የትምህርት ቤቱን መስራች አቶ ታፈሰ ውብሸትን በ0913 74 39 49 ላይ ማግኘት ትችላላችሁ…

የትምህርት ቤቱ ድረገፅ www.fregenetfoundation.org

ንጋቱ ሙሉ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers