• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር ወሬዎች እና ልዩ ወሬዎች

በደረቅ ወደቦች የተከማቹ 2 ሺ 236 ኮንቴነሮችና 61 ተሽከርካሪዎች በመንግሥት ሊወረሱ ነው ተባለ

በደረቅ ወደቦች የተከማቹ 2 ሺ 236 ኮንቴነሮችና 61 ተሽከርካሪዎች በመንግሥት ሊወረሱ ነው ተባለ፡፡በደረቅ ወደብ ላይ ለመቆየት ከሚፈቀደው 60 ቀን በላይ ቆይተዋል ከተባሉት ኮንቴነሮች መካከል 616ቱ የመንግሥት ሲሆኑ 156ቱ የመንግሥት የልማት ድርጅቶች ንብረት ናቸው ተብሏል፡፡

1 ሺ 466 ያህሉ ደግሞ የግል አስመጭ ንብረቶች መሆናቸውን የኢትዮጵያ ገቢዎችና ጉምሩክ ባለሥልጣን ለሸገር ተናግሯል፡፡ከኮንቴነሮቹ በተጨማሪ ከሚወረሱት 61 ተሽከርካሪዎች መካከልም 2ቱ ብቻ የመንግሥት መሆናቸውን ሰምተናል፡፡ከ20 ቀን በፊት በደረቅ ወደቦች የተከማቹ ኮንቴነሮችን አስመጭዎቹ እስከ ታህሣስ 30 ቀን ድረስ እንዲያነሱ ተነግሯቸው ነበር ያሉን በባለሥልጣን መሥሪያ ቤቱ የጉምሩክ ቅርንጫፍ ጽ/ቤቶች ድጋፍና ክትትል ዳይሬክቶሬት ዳይሬክተር የሆኑት አቶ ደበሌ ቀበታ ናቸው፡፡አቶ ደበሌ እንዳሉት በጊዜ ገደብ ውስጥ 768 የግል ድርጅቶች ኮንቴነሮቻቸውን አንስተዋል፡፡

 

የመንግሥት ንብረት ከሆኑት 616 ኮንቴነሮች መካከል ግን አንድም እንዳልተነሳና 400 ያህሉም የትምህርት ሚኒስቴር ንብረቶች መሆናቸውን ሰምተናል፡፡ኮንቴነሮቹ በሞጆ፣ በድሬዳዋ፣ ሰመራ፣ ቃሊቲ፣ ኮምቦልቻ፣ መቐሌና ገላን ደረቅ ወደቦች ተከማችተው ይገኛሉ፡፡በመጭው ጊዜም የኢትዮጵያ የባህር ትራንስፖርትና ሎጅስቲክስ አገልግሎት ድርጅት ይወረሳሉ የተባሉትን 2 ሺ 236 ኮንቴነሮችና 61 ተሽከርካሪዎችን ለጉምሩክ ያስረክባል ብለዋል አቶ ደበሌ፡፡

ኮንቴነሮቹ ውስጥ ያሉ ንብረቶችም ከተለዩ በኋላ በጨረታ ይሸጣሉ የአገልግሎት ጊዜ ያለፈባቸውንም በመቅበር፣ በማቃጠልና በማፍሰስ እንዲወገዱ ይደረጋል ብለዋል፡፡ባለፈው አመትም ባለቤቶቻቸው ከደረቅ ወደብ ላይ በጊዜ ያላነሷቸው 278 ኮንቴነሮች በመንግሥት መወረሳቸው ይታወሣል፡፡

ትዕግስት ዘሪሁን

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn