• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ኀዳር 11፣2009

ዘመቻ ሙሴ

እስራኤል ዘሮቼ ናቸው ደማቸው ከደሜ ይቀዳል ያለቻቸውን የኢትዮጵያ ቤተ እስራኤላውያንን ኑ ወደቤታችሁ ስትል ስትሰበስባቸው ቆይታለች፡፡

በዘመቻ ሙሴ ሚስጥራዊ ጉዞ የመጀመሪያዎቹ የኢትዮጵያ ቤተ እስራኤላውያን ከሱዳን በአውሮፕላን ወደ እስራኤል የተጓጓዙት የዛሬ 31 ዓመት በዛሬዋ ቀን ነበር፡፡

ወቅቱ ለኢትዮጵያም ሆነ ለኢትዮጵያውያን እጅጉን አስቸጋሪ ጊዜ ነበር፡፡

ሰሜኑ የአገሪቱ ክፍል ከጫፍ ጫፍ በእርስ በርስ ጦርነት እየጋየ፤ መሞት መግደሉና እልቂቱ የእለት ተዕለት አስቃቂ ትዕይንት ነበር፡፡

በዚህ የአገር ክፍል ችግሩ በረታ፡፡ ረሃቡ ጠና፡፡

እስራኤል በዚህ ጊዜ የኔ ናቸው ያለቻቸውን ቤተ እስራኤላውያን ከጐንደር ገጠሮች አስወጥታ ልትወስዳቸው ሚስጥራዊውን የሙሴን ዘመቻ ጀመረች፡፡ 

ቤተ እስራኤላውያኑን ወደ እስራኤል በማጓጓዙ ተግባር የእስራኤል ጦር፤ የአሜሪካው ማዕከላዊ የስለላ ድርጅት /ሲ.አይ.ኤ/፤ በካርቱም የአሜሪካ ኤምባሲና የሱዳን የደህንነት ተቋም በትብብር መሠለፋቸው ይነገራል፡፡

ቅጥረኞችም ሳይቀሩ የዚህ ዘመቻ ተባባሪ ነበሩ፡፡

ቤተ እስራኤላውያኑ በሱዳን ወደ ተዘጋጁላቸው ጊዜያዊ መጠለያ ጣቢያዎች ለመድረስ ከጐንደር ገጠሮች ተነስተው ድንበር አቋርጠው የሱዳንን በረሃማ መሬት በእግር መኳተን ነበረባቸው፡፡ ጉዞው እጅግ አድካሚ፣ አታካችና አለፍ ሲልም መስዕዋትነት ጠያቂ ነበር፡፡

የበረቱት ኳትነው ከጊዚያዊ መጠለያቸው ደረሱ፡፡ አቅም ያጡትና ያላደላቸው ካሰቡት ሳይደርሱ በየዱሩና በየበረሃው የቀሩም ብዙዎች ናቸው ይባላል፡፡

ተጨማሪ ያንብቡ...

አስተያየት ይፃፉ (0 አስተያየት)

ታሪክን የኋሊት፣ኀዳር 9፣2009

የኢራቅ ነገር

በሳዳም ሁሴን ትመራ የነበረችዋ ኢራቅ ከአሜሪካ ጋር ጠላትነቷ ሲበረታ ከዋሽንግተን በኩል የሕዝብ ጨራሽ መሣሪያዎችን ታጥቃለችና ትፈተሽልኝ የሚለው ግፊቱ በርትቶባት ነበር፡፡

በዶክተር ሐንስ ብሌክስ የተመራው የተባበሩት መንግሥታት የኒኩሊየር ጦር መሣሪያዎች ተቆሪጣጣሪ አካል ለመጀመሪያ ጊዜ ኢራቅ የገባው የዛሬ 13 ዓመት በዛሬዋ ዕለት ነበር፡፡

ከዚህ ጊዜ 10 ዓመታት በፊት ኢራቅ ትንሿ ጐረቤቷን ኩዌትን ወረረች፡፡

የወቅቱ የኢራቅ መሪ ሳዳም ሁሴን ኩዌትን ለቀው እንዲወጡ ዓለም ተማፀናቸው፡፡

እነ አሜሪካ አስፈራሯቸው፡፡ ወዳጆቻቸው አባበሏቸው፡፡

የፀጥታው ምክር ቤት ቢገስፃቸውና ማስጠንቀቂያም ቢሰጣቸው በጄ አላሉም፡፡

አሜሪካ ወዳጅ ደጋፊዎቿን አሰልፋ በበረሃው ማዕበል ዘመቻ የኢራቅን ጦር ከኩዌት ነዳችው፡፡

የበረሃው ማዕበል ዘመቻ ኩዌትን ነፃ በማውጣት ቢደመደምም አሜሪካ በሣዳም አስተዳደር ላይ ቂም እንደቋጠረችባት ዘለቀች፡፡                                                      

ኘሬዝዳንት ጆርጅ ቡሽ ትልቁ ያዳከሙትን የኢራቅ ጦር ለማሽመድመድ ጆርጅ ቡሽ ትንሹ ቁርጥ ውሳኔ ላይ ደረሱ፡፡

ተጨማሪ ያንብቡ...

አስተያየት ይፃፉ (0 አስተያየት)

ታሪክን የኋሊት፣ኀዳር 8፣2009

ዓለም ያወደሰው የናይጄሪያ የፖለቲካ ጉዞ - ከወታደራዊ መፈንቅለ መንግሥት ወደ ዲሞክራሲ

ናይጄሪያ እንዲህ እንዳሁኑ በአፍሪካ የሰላማዊ የስልጣን ሽግግር ተምሳሌት ከመሆኗ አስቀድሞ ታሪኳ በወታደራዊ የመንግስት ግልበጣ የተሞላ ሆኖ ቆይቷል፡፡

አገሪቱ ከ17 ዓመት በፊት ከወታደራዊ ግልበጣ ጣጣ እስከወጣች ድረስ አገሪቱ ቢያንስ ዘጠኝ ወታደራዊ መፈንቅለ መንግስቶች ተካሂደውባታል፡፡

ጄኔራል ሳኒ አባቻ ወር ተረኛው ሆነው የአርነት ሾኔካን የሽግግር አስተዳደር ገልብጠው የመንግስት ስልጣኑን የጨበጡት የዛሬ 23 ዓመት በዛሬዋ ዕለት ነበር፡፡

ያኔ ኧርነስት ሾኔካን የሽግግር አስተዳደሩ መሪ የሆኑት ናይጄሪያ የወታደራዊ አምባገነን መሪዎች ፍርርቅ ባንገፈገፋት ጊዜ ነው፡፡

ናይጄሪያውያን ከእንግዲህስ እንዲህ ዓይነቱ አገዛዝ ይብቃን ባሉ ጊዜ ወደ ዴሞክራሲያዊ ዘይቤ ለመሻገር ቁርጥ ኃሳብ አደረጉ፡፡ የጊዜውን ወታደራዊ መሪ ጄኔራል ኢብራሂም ባባንጊዳ ሰልጣኑን ለተመራጩ ሕጋዊ መንግስት እንዲያስረክቡ አስገደዷቸው፡፡

ባባንጊዳም እንደተጠየቁት ስልጣኑን አንካችሁ አሉ፡፡

ለሰላማዊ የስልጣን ማስተላለፉን ለማቀለጣጠፍ የሽግግሩን አስተዳደር እንዲመሩ ሕግ አዋቂ ናቸው የሚባሉት ኧርነስት ሾኔካን ተሰየሙ፡፡

ሾኔካን በሽግግሩ መሪነት የተሰየሙት ሂደቱን ለማቀለጣጠፍ በፖለቲካ ገለልተኝነታቸው ሁነኛው ሰው ሆነው በመገኘታቸው ነበር፡፡ ሽግግሩን ሌላኛው ወታደራዊ መሪ ጄኔራል ሳኒ አባቻ ቀደሙት፡፡

አባቻ የሾኔካንን አስተዳደር በመፈንገል ወር ተረኛው ገልባጭ ሆኑ፡፡

ተጨማሪ ያንብቡ...

አስተያየት ይፃፉ (0 አስተያየት)

ታሪክን የኋሊት፣ኀዳር 7፣2009

ቤናዚር ቡቶ

ቤናዚር ቡቶ ሴቶች በማኅበራዊ፣ በምጣኔ ሐብትና በፖለቲካው ዝቅ ተደርገው በሚታዩበት ፓኪስታን አንፀባራቂ ኮከብ ሆነው ሲታዩ ቆይተዋል፡፡

እሳቸውም ወር ተረኝነቱ ደርሷቸው የፓኪስታን ጠቅላይ ሚኒስትር ሆነው የተመረጡት የዛሬ 28 ዓመት በዛሬዋ ዕለት ነበር፡፡

የቤናዚር ቡቶ አባት ዙልፊካር ዓሊ ቡቶ የፓኪስታን ምክትል ፕሬዝዳንት ሆነው አገልግለዋል፡፡

ጠቅላይ ሚኒስትርም ሆነው ሰርተዋል፡፡

ነቀፋውና ሙገሳው እንዳለ ሆኖ አሁንም ድረስ ሥማቸው ከፓኪስታን ተፅዕኖ አሳዳሪዎች አንዱ ሆኖ ይነሳል፡፡

የቤናዚር ቡቶ አባት ዙልፊካር ዓሊ ቡቶ የአገሪቱ ጠቅላይ ሚኒስትር ሆነው ከመመረጣቸው 10 ዓመታት አስቀድሞ በጄኔራል ዚያ ኡል ሃቅ በተፈፀመባቸው ወታደራዊ ግለበጣ ሥልጣናቸውን አጡ፡፡

ሥልጣናቸውን ብቻ ሳይሆን ለጄኔራል ዚያ ኡል ሃቅ ቅርበት የነበራቸው ዳኞች ተሰይመውበታል በተባለ ችሎት ይሙት በቃ ተፈርዶባቸው ሕይወታቸውንም ተቀሙ፡፡

ይሄ ሁሉ ሆኖ ሴት ልጃቸው ቤናዚር ቡቶ ከፖለቲካው ሰፈር እንዲያፈገፍጉ አላደረጋቸውም፡፡

ቤናዚር ቡቶ ከለንደን ከነ ቤተሰባቸው ወደ ፓኪስታን ሲመለሱ ታላቅ ምርጫ ጠበቃቸው፡፡

የፖለቲካ ማኅበራቸውን በወጉ መርተው ለድል አበቁት፡፡

ለፓኪስታን ከዚያ ቀደም ባልተለመደ ሁኔታ የዛሬ 28 ዓመት በዛሬዋ ዕለት የአገሪቱ ጠቅላይ ሚኒስትር ሆነው በመመረጥ ታሪክ ሰሩ፡፡

ተጨማሪ ያንብቡ...

አስተያየት ይፃፉ (0 አስተያየት)

ታሪክን የኋሊት፣ጥቅምት 30፣2009

የጀርመን ግምብ መፍረስ

የበርሊን ግምብ በፍልስፍናና በአስተዳደር ዘይቤ የአንድ አገር ሰዎችን ለሁለት በመክፈል የቀዝቃዛው ጦርነት ዘመን የጥላቻ ግድግዳ ተደርጐ ይቆጠራል፡፡

ለዓመታት ጀመርኖችን ከፋፍሎ የቆየው ግንብ ክፍት ሆኖ ምሥራቅ ጀርመናውያን ወደ ምዕራቡ እንዲሻገሩ የተፈቀደላቸው የዛሬ 27 ዓመት በዛሬዋ ዕለት ነበር፡፡

የጀርመን ናዚዎች ዓለምን በመዳፋችን ውስጥ እናውላለን ብለው ከ77 ዓመታት በፊት ጦርነት አቀጣጠሉ፡፡ የኋላ ኋላ በተነሱበት ፍጥነት መቀጠል ተሳናቸው፡፡

በሌሎች ላይ የለኮሱት እሳት ራሳቸውን ማቃጠሉን ያዘው፡፡

የህብረቱ ኃይሎች ከየአቅጣጫው መጡባቸው የአንግሎ አሜሪካ ኃይል ከምዕራብ፤ የሩሲያ ሠራዊት ከምስራቅ አቅጣጫ መጡባቸው፡፡

መፈናፈኛ አጡ፡፡

አገራቸው በህብረቱ ኃይሎች ተፅዕኖ ስር ወደቀች፡፡

ከጦርነቱ በኋላ ምዕራባዊ ክፍሏ በአሜሪካ እንግሊዝና ብሪታንያ አስተዳደር ስር ሆነ፡፡
በምስራቃዊው ክፍል ደግሞ የሶቪየት ህብረት ተፅዕኖ ሰፈነ፡፡

ምዕራባዊው ክፍል የጀርመን ፌዴራል ሪፐብሊክ ተሠኝቶ ራሱን ቻለ፡፡

የምስራቁም ግዛት ምስራቅ በርሊንን ርዕሠ ከተማው በማድረግ በሶቪየት ተቀጥላነት የጀርመን ዴሞክራሲያዊ ሪፐብሊክ ተባለ፡፡

በዚያን ጊዜው የሶቪየቶች መሪ ኒኪታን ኩርቺየቭ ቀጭን ትዕዛዝ ከግማሽ ምዕተ ዓመት በፊት በአንድ ሌሊት ምስራቅ በርሊን ዙሪያዋን በ155 ኪሎ ሜትር መጠነ ዙሪያ የማገጃ አጥር ተገጠገጠባት፡፡

የድንበር ጠባቂ ፖሊሶችም የተኩሰህ ግደል ፈቃድ ተሰጣቸው፡፡ በዘመኑ ግንቡን ዘለው ወደ ምዕራብ በርሊን ለመሻገር የሞከሩ ብዙዎች የአልሞ ተኳሾች ጥይት ዒላማ ሆነዋል፡፡
በዚህ አይነቱ ሙከራ የተገደሉት ከ200 እንደማያንሱ ይነገራል፡፡

ተጨማሪ ያንብቡ...

አስተያየት ይፃፉ (0 አስተያየት)