• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ጥር 3፣2009

ፔሩን ያጋጠማት የሁአስካራኑ የበረዶና የቋጥኝ ናዳ

የላቲን አሜሪካዋ አገር ፔሩ በታሪኳ በርካታ የተፈጥሮ አደጋዎች አጋጥመዋታል፡፡

አገሪቱ ከ4 ሺህ ያላነሱ ሰዎች የጨረሰው ታላቁ የሁአስካራን የበረዶ ናዳና የመሬት መንሸራተት አደጋ የደረሰባት የዛሬ 55 ዓመት በዛሬዋ ዕለት ነበር፡፡

የበረዶና የድንጋይ ናዳው መነሻ የሁአስካራን ተራራ የአንድስ ሰንሰለታማ ተራሮች አካል ነው፡፡

ከባሕር ወለልም የ6 ሺህ 768 ሜትር ከፍታ አለው፡፡

አካባቢው ከታላቁ ናዳም በፊት መሰል አጋጣሚዎች ተስተውለውባት ያውቃሉ፡፡

ከ55 ዓመታት በፊት በዛሬዋ ዕለት የደረሰው ግን ከተራራው ግርጌ ላሉ ከተሞችና መንደሮች ነዋሪዎች የማሰቢያ ጊዜ አልተወላቸውም፡፡

አሰቃቂውና ያልተጠበቀው ነገር በአፍታ በመሆኑ ለብዙዎቹ የግርጌ ነዋሪዎች የመሸሻና ከለላ የመፈለጊያ ሽርፍራፊ ሴኮንድ አልቸራቸውም፡፡

በተራራው ላይ የደረሰ ስንጥቃት ሁአስካራንን የሸፈነውን ግግር በረዶ ብቻ ሳይሆን አለቱንም ፈነቃቀለው፡፡

ከተራራው የበረዶና የአለት ናዳ ቁልቁል ከመንደርደሩ አስቀድሞ ታላቅ የቁጣ ዓይነት አስፈሪ ድምፅ አሰማ፡፡

 

የበረዶና የዓለት ናዳው ከፊቱ ያጋጠመውን ሁሉ እየጠራረገ እያወደመ ገሰገሰ፡፡

ቅፅበታዊው ናዳ የተፈጠረው የተራራው ግርጌ አነስተኛ ከተሞችና መንደሮች ነዋሪዎች ለእራት በየቤታቸው በተሰበሰቡበት ምሽት ነበር፡፡

ናዳው 6 ሚሊዮን ቶን ግግር በረዶና ቋጥኝ የተሸከመ መሆኑ የአጥፊነት አቅሙን ክብደት ያሳያል፡፡

በዚያ ላይ ፍጥነቱ ራንራሂርካ የተባለችውን መንደርና 8 የአቅራቢያዋ አነስተኛ ከተሞችን ነዋሪዎች በጥፋቱ ጐበኛቸው፡፡

ከዚህ አደጋ ተረፉ ቢባል ለወሬ ነጋሪነት ያህል በጣት የሚቆጠሩ ናቸው ይባላል፡፡

አስክሬናቸውንም እስከ ፓስፊክ ውቅያኖስ አንከብክቦ የወሰዳቸውም አሉ፡፡

በዚህ አደጋ ከ4 ሺህ ያላነሱ ሰዎች በበረዶና በአለት ናዳና በጭቃ ማጡ ሕይወታቸውን አጥተዋል፡፡

ከ10 ሺህ በላይ እንስሳትም የዚሁ አደጋ ሰለባዎች ሆነዋል፡፡

የእርሻ ሰብሎች፣ አትክልቶችና ቁጥቋጦዎችን ሳይቀር አውድሟል፡፡

የሁአስካራኑ የበረዶና የቋጥኝ ናዳ እንዲሁም የጭቃ ማጥ አደጋ ፔሩን ከገጠሟት አስከፊ የተፈጥሮ አደጋዎች  አንዱ ሆኖ ይታወሳል፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers