• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ጥር 2፣2009

የአሜሪካ የእርስ በርስ ጦርነት

አሜሪካ እንደ አገር ከቆመች በኋላ ከአንድ ምዕተ ዓመት ባልበለጠ ጊዜ የመበታተን ስጋት ተጋርጦባት ነበር፡፡

አንድነቷ ፈተና ላይ ወደቀ፡፡

ያኔ ባሪያ አሳዳሪነት የሰሜንና የደቡብ ግዛቶች የልዩነት መነሻ ሆነ፡፡

ባሪያ አሳዳሪነትን እንደ ልዩ ምጣኔ ሐብታዊ ጠቀሜታ ያዩት ደቡባዊ ግዛቶች ለስርዓቱ መቀጠል ሽንጣቸውን ገትረው ቆሙ፡፡

አብዛኞቹ ሰሜናዊ ግዛቶች ባርነት መወገድ አለበት አሉ፡፡

ሰባት የባሪያ አሳዳሪ ስርዓት ደጋፊ ደቡባዊ የአሜሪካ ግዛቶች አንድ በአንድ በየፊናቸው ከሕብረቱ ተነጥለናል ማለቱን ተያያዙት፡፡

ደቡባዊቷ የፍሎሪዳ ግዛት ከአሜሪካ ህብረት ተነጥዬ ራሴን የቻልኩኝ ነኝ ብላ የተለየችው የዛሬ 155 ዓመት በዛሬዋ እለት ነበር፡፡ 

ደቡብ ካሮላይና፣ ሚሲሲፒ፣ አላባማ፣ ሉዊዚያና፣ ጆርጂያና ቴክሳስም በተመሳሳይ የመነጠል መንገድ ተጓዙ፡፡

ባርነት መቅረት የለበትም ብለው የቆረጡ ግዛቶች ራሳቸውን ከአሜሪካ ፌዴራላዊ ህብረት በመለየት ኮንፌዴራላዊ ጥምረት ፈጠሩ፡፡ ጀፈርሰን ዴቪስን ፕሬዝዳንት፤ ማዕከላቸውን አላባማ በማድረግ የተነጠለውን ኮንፌዴራላዊ መንግስት መሠረቱ፡፡

የፀረ ባርነት አቀንቃኙ አዲሱ የአሜሪካ ፕሬዝዳንት አብርሃም ሊንከን የአንድነቱን ደጋፊ የሰሜን ግዛቶች አስተባብረው ለፌዴራላዊ ኅብረት በፅናት ቆሙ፡፡

መነጣጠሉ ከተጀመረ ከጥቂት ወራት በኋላ የህብረቱ ኃይሎች ይዞታ በሆነው በፎርት ሳምተር ደቡባዊያኑ ያስጮኋት ጥይት የአሜሪካ የእርስ በርስ ጦርነት ማስጀመሪያ ፊሻካ ሆነች፡፡

ከፎርት ሳምተሩ ግጭት በኋላ አርካንሳስ፣ ሰሜን ካሮላይና ቴኔሲና ቨርጂኒያ ተገንጣዮቹን ግዛቶች በመቀላቀል ኮንፌዴራሊስቶቹ አስራ አንድ ደረሱ፡፡

ልዩነቱ እየሠፋና ቅራኔው እየተካረረ መጣ፡፡

 

የአንድነት ኃይሎች የጦር ጠቅላይ አዛዥ ፕሬዝዳንት አብራሃም ሊንከን የደቡብ ግዛቶችን መፈናፈኛ ለማሳጣት ከወደቦቻቸው መርከቦች እንዳወጡና ከውጭም ወደ ባሕር ዳርቻዎቻቸው እንዳይጠጉ አዘዙ፡፡

የጦርነቱ አድማሱ ሰፍቶ እልቂቱ በዝቶ ለአራት ዓመታት ዘለቀ፡፡

በምድረ አሜሪካ ከተካሄዱ ጦርነቶች ሁሉ በሕዝብ ጨራሽነቱና በደም አፋሳሸነቱ ወደር ታጣለት፡፡

በእርስ በርስ ጦርነቱ ውስጥ ተሰልፈው ከተዋጉት መካከል ከግማሽ ሚሊዮን የሚልቁትን ሕይወት ቀጠፈ፡፡

ቁስልና የአካል ጉዳት የገጠማቸው ደግሞ በጦርነቱ ከተገደሉት ከእጥፍ በላይ ነበሩ፡፡ የእርስ በርስ ጦርነቱ መጠነ ሰፊ የንብረትና ቁሳዊ ውድመትም አስከተለ፡፡

ሰሜኖቹ የአንድነት ኃይሎች የበላይነቱን ጨበጡ፡፡

አሸነፉ፡፡

ተገንጣዮቹ የደቡብ ግዛቶች ጦርነቱ በተጀመረ በ4ኛ ዓመቱ እጅ ለመስጠት ተገደዱ፡፡ ባሪያ አሳዳሪነትም ላይመለስ ተንኮታኮተ፡፡ የአሜሪካ የመበታተን አደጋ ስጋት ተወገደ፡፡

አሜሪካውያን ከዚያ በኋላ የእርስ በርስ ጦርነቱን የሚያስቡና የሚዘክሩት ጠንካራዋንና ታላቋን አገራቸውን ይበልጥ ጠንካራና ይበልጥ ታላቅ የምትሆንበትን መፃኢ እድሏን አሻግረው በማየት ነው፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn