• United Bank S.C.

    ሕብረት ባንክ አ.ማ.

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ታህሳስ 14፣2009

የአፍጋኒስታን ነገር

አፍጋኒስታን እንዲህ እንዳሁኑ ከ30 ዓመታት በፊትም ሰላም አልነበራትም፡፡

የቀድሞዋ ሶቪየት ኅብረት ጦር ተባባሪዎቼ ናቸው ያላቸውን የአገሪቱን የፖለቲካ ወገኖች ለመደገፍ ወደ መዲናዋ ካቡል የዘለቀው የዛሬ 37 ዓመት በዛሬዋ ዕለት ነበር፡፡

ከወረራው ቀድሞ በነበሩ ዓመታት በአፍጋኒስታን በተለያየ ደረጃ ለሶቪየቶች ቅርበት የነበራቸው የአገሬው ፖለቲከኞች ሥልጣን ላይ የነበሩ ቢሆንም እርስ በርሣቸው ሽኩቻ ያዙ፡፡

በዚያ ላይ እዚህም እዚያም በአስተዳደሩ ላይ ብረት ያነሱ አማፂያን እንደ አሸን ፈሉ፡፡

የዘመኑ የአፍጋኒስታን ፕሬዝዳንት ሐፊዙላህ አሚን የሶቪየቶቹ ግልፅ ጠላት ባይሆኑም በሥልጣን ላይ ከነበረው የፖለቲካ ማኅበር የሶቪየቶች ታማኞችን ማባረር መግደላቸው በሞስኮ ቂም አስቋጠረባቸው፡፡

ለሞስኮ ያላቸውም ታማኝነት ጥርጣሬ ውስጥ ገባ፡፡

ከዘመኑ የአሜሪካ ጉዳይ ፈፃሚ ጋር በሚስጥር መምከራቸውን ሶቪየቶቹ ደረሱበት፡፡

አሚን የአሜሪካ ማዕከላዊ የስለላ ድርጅት /CIA/ ምልምል ናቸው ከሚል ድምዳሜ አደረሳቸው፡፡

አቄሙባቸው፡፡

በቀድሞዋ ሶቪየት ኅብረት ገናና የስለላ ድርጅት /KGB/ የሚደገፉ የሶቪየት አልፋ ኮማንዶ ክፍል ልዩ ኃይል ወታደሮች የአፍጋኒስታንን መደበኛ ሰራዊት የደምብ ልብስ በመልበስ ርዕሰ ከተማዋ ካቡልን ከተቀረው የአገሪቱ ክፍል ቆርጠው ሙሉ በሙሉ ተቆጣጠሯት፡፡

 

ወሳኝ የመንግሥት ሕንፃዎችን የመገናኛ ብዙሃን ተቋሞችንና የጦር ሰፈሮችን በእጃቸው አስገቡ፡፡

ፕሬዝዳንት ሃፊዙላህ አሚን የአፍጋኒስታን መንግስት ወታደሮች በተመሠሉት የሶቪየት ልዩ ኃይሎች ተገደሉ፡፡

በሶቪየቶች የተደገፉትና በቀድሞዋ ቼኮዝሎቫኪያ የአፍጋኒስታን አምባሳደር የነበሩት ባብራክ ካርማል የአገሪቱ መንግሥት የበላይ ሆኑ፡፡

ካርማል የሶቪየትን ጦር ለእርዳታ ጠርቻለሁ እውቁልኝ አሉ፡፡

ከሰሜን አቅጣጫ ብረት በብረት የሆነ የሶቪየት ኅብረት ጦር እየተንደረደረ ወደ አፍጋኒስታን ገባ፡፡

የሶቪየት ጦር ወደ አፍጋኒስታን ሲዘልቅ በአገሪቱ ተፅዕኖውን ከማጠናከርም በተጨማሪ ደቡባዊ ድንበሩንም በአስተማማኝ ሁኔታ የመጠበቅም ተደራቢ ዓላማ ይዞ ነበር፡፡

የሶቪየቶች ወደ አፍጋኒስታን መዝለቅ ሙጃኸዲን የተሰኙ የወረራውን ተቃዋሚዎች ጥራኝ ዱሩ አሰኛቸው፡፡

ታላቁ የአፍጋኒስታን ፍጅትና ዕልቂት ያኔ ተጀመረ፡፡

ከ9 ዓመታት በላይ ባስቆጠረው የሶቪየቶች ወረራ ዘመን እስከ 1 ነጥብ 5 ሚሊዮን የሚደርሱ አፍጋኒስታናውያን አለቁ፡፡

ሶቪየቶቹም 15 ሺህ ያህል ወታደሮችና መኮንኖቻቸውን በጦርነቱ አጡ፡፡

ከዚያ ጊዜ በፊትም ሆነ በኋላ አፍጋኒስታን ሰላም የሚባል ነገር አታውቅም፡፡

አሁን ደግሞ በሰሜን አትላንቲክ የጦር ቃል ኪዳን ድርጅት /ኔቶ/ የሚደገፈው የአገሩ መንግሥት ከታሊባንና ከሌሎች ፅንፈኞች ጋር ባልተቋረጠ ጦርነት ውስጥ ይገኛል፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers