• United Bank S.C.

    ሕብረት ባንክ አ.ማ.

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ታሪክን የኋሊት፣ኀዳር 28፣2009

የስፒታኩ ርዕደ መሬት

አርመኒያ የምትገኝበት የዓለማችን ክፍል በከፍተኛ የርዕደ መሬት አደጋ ተጋላጭነታቸው ከሚታወቁት አካባቢዎች አንዱ ነው፡፡

አገሪቱን አስከ 50 ሺህ የሚገመቱ ዜጐቿን የጨረሰባትና መጠነ ሰፊ ውድመት ያደረሰባት ርዕደ መሬት ያጋጠማት የዛሬ 28 ዓመት በዛሬዋ ዕለት ነበር፡፡

አርመኒያ የምትገኝበት ሥፍራ ከአውሮፓው አልፕስ እስከ እስያው ሂማላያ ተራሮች የተዘረጋው የእሳተ ገሞራ ሰንሰለት የተዘረጋባት መሆኑ ለመሬት ነውጥ ከተጋለጡት አገሮች አንዷ ያደርጋታል፡፡

አገሪቱ በታላቁ ርዕደ መሬት ከመመታቷ ዓመት አስቀድሞ ካውካሰስ የተሰኘው አካባቢ በፖለቲካዊ ቀውስ ይናጥ ያዘ፡፡

በዚያ ጊዜ የሶቪየት ኅብረት አካል የነበሩት አርመኒያና አዘርቫጃን ናጐርና ካራባክ በተሰኘችዋ ግዛት ይገባኛል ጠባቸው ከጫፍ ደረሰ፡፡

ለገላጋይ አስቸገሩ፡፡

በቀጠናው የጦርነት ደመና አንዣበበ፡፡

አርመኒያ በዚህ ውጥረትና ፍጥጫ ውስጥ እያለች እንደ ጀበና የተጣደችበት እሳተ ገሞራም ሆድ ባሰው፡፡

ተራራማዋን አገር በርዕደ መሬት መለኪያ ሬክተር ስኬል 6 ነጥብ 6 የተመዘገበ ነውጥ ለ20 ሰኮንዶች እንደ ኳስ አጐናት፡፡ አንቀረቀባት፡፡

ርዕደ መሬቱ የንቅናቄ ማዕከሉን ስፒታክ የተሰኘችውን ከተማ በማድረጉ በታሪክም የስፒታኩ ነውጥ የሚል ስያሜ ተሰጠው፡፡

 

ራሷ ስፒታክን፣ ጉምሪንና ቫናድዞር የተባሉ ከተሞችን እንዳልነበሩ አድርጐ አፈራረሳቸው፡፡ መነቃቀራቸው፡፡

ወደ ድንጋይ ክምርነት ለወጣቸው፡፡

ሰብዓዊ ዕልቂቱም የከፋ ነበር፡፡

የስፒታኩ የርዕደ መሬት አደጋ የጨረሳቸው ሰዎች ብዛት ከ50 ሺህ እንደማያንስ ስለ አደጋው በተፃፉ ድርሳናት ሰፍሮ ይገኛል፡፡

ከ130 ሺህ የማያንሱ ሰዎች ደግሞ የተለያየ ደረጃ አካላዊ ጉዳት ገጥሟቸዋል ይባላል፡፡

በተለይም በሊዮኔድ ብሬዥኔቭ የአስተዳደር ዘመን መኖሪያ ቤቶችን ለማዳረስ ሲባል በይድረስ ይድረስ የተሰሩ ሕንፃዎች የአደጋ መቋቋም አቅም ማጣት ለእልቂትና ጉዳቱ መብዛት አንዱ ምክንያት ነበር ይባላል፡፡

ወቅቱ ዓለማችን ከቀዝቃዛው ጦርነት ፍጥጫ ያልተገላገለችበት ቢሆንም የዘመኑ የቀድሞዋ ሶቪየት ኅብረት መሪ ሚሐየል ጐርቫቾቭ አሜሪካ ሆይ እርጂን ከማለት ወደ ኋላ አላሉም፡፡

ከአሜሪካ በተጨማሪ 113 የዓለማችን አገሮች እንደየ አቅማቸው ለአርመኒያ የሰብዓዊ ዕርዳታ አቅርቦት እጃቸውን በመዘርጋት ርሕራሄያቸውን አሳይተዋል፡፡

የነፍስ አድን ቡድኖቻቸውንም የላኩ አሉ፡፡

የስፒታኩ ርዕደ መሬት በቅርብ ጊዜ የዓለማችን ታሪክ ከደረሱት ዘግናኝና አውዳሚ ነውጦች አንዱ ሆኖ ይታወሳል፡፡

የኔነህ ከበደ

በማኅበረ ሰብ ገጾች ያጋሩ

Submit to FacebookSubmit to Google PlusSubmit to TwitterSubmit to LinkedIn
Sheger 102.1 AudioNow Numbers