• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር | ወግ

የሬድዮ ነገር

“እሁድ፣ እሁድ ለዘማቹ ጓዴ ለጸጋዬ ኃይለ ማርያም፣ እያልሽ ዘፈን እንድትመርጭልኝ፣” ይላል የኦሮማዩ ጸጋዬ ኃይለ ማርያም፡፡ በነገራችን ላይ የዘፈን ምርጫው ነገር ሲታሰብ እኮ … አለ አይደል የተመረጠው ዘፈን ሁልጊዜ ዘማቹን ያስደስተዋል ማለት አይደለም፡፡ እሱ ቀበሮ ጉድጓድ አይነት ነገር ውስጥ ሆኖ ከዛሬ ነገ “ጦር ሜዳ እስካሁን ያገለገልከው ይበቃሀል፡፡ ወደ ከተማ ተመልሰህ በተቋማት ጥበቃ ላይ ትሰማራለህ እባላለሁ” ብሎ ልቡ ቆሞ እያለ ሚስት፣ “በእንትን ግንባር ለሚገኘው ውዱ ባለቤቴ ውረድ በለው ግፋ በለው የሚለውን ዘፈን መርጫለሁ” ስትል ይታያችሁ፡፡

“በሰላም ይመልስህ፣ ናፍቀኸናል፣ ምናምን ነገር እያለ … ጭራሽ ውረድ ‘በለው! ግፋ በለው!’ ስትል ባል ሆዬ “ይሄኔ ከዛ ከከይሲ የአብዮት ጥበቃ ሊቀመንበር ጋር ነገር ጀምራ እንዳልመለስ ፈልጋ ይሆናል…” ሊል ይችላል፡፡“አንዱ እጁን አውጥቶ ‘ሙዚቃው ሁሉ አሳደው፣ ግረፈው፣ ግደለው ነው የሚለው፡፡ ምን ማድረግ እንችላለን” ይላል ኦሮማይ ላይ፡፡ እናማ፣ ሬድዮ ለ“አትመልከች ሱፍ፣ አትዪ መኪና…” ብቻ ሳይሆን… ለ“አሳደህ በለውም” ያገለግል ነበር፡፡ ደግሞም… ‘ውሳኔ’ እንደሚሉት ፊልም አይነት እንባ በእንባ ለማድረግም ሬድዮን ማን ብሎት! “ወልደሽ ያሳደግሽኝ እናቴ ናፈቅሽኝ የሚለውን ዘፈን የዛሬ አሥራ ስምንት ዓመት ለተለየችኝ እናቴ…” ምናምን ይባልና አገር ለቅሶ በለቅሶ፡፡

የአሁኑን እንጃ እንጂ በፊት እኮ የሬድዮ የዘፈን ምርጫ የሚከታተለው ሰው ዘንድሮ ዛራ ቻንድራን መጀመሪያ አካባቢ ስንከታተል እንደነበርነው አይነት ነበር፡፡ (እግረ መንገድ … ስለሆነ ጉዳይ ለመነጋገር በተጠራ ስብሰባ ላይ ልክ አስራ ሁለት ሰዓት ሲሞላ “የዛራና ቻንድራ ሰዓት ደረሰ፣” ብለው ስብሰባውን በተኑት ሰለተባሉት ሰው የተቀለደው ነገርዬ መነሻ ቢጤ ነበረው እንዴ!”)
ሬድዮ አሁን “አንዳንድ ቀንማ ይሻላል ውሽማ…” አይነት ዘፈን ሊዘፈንለት፣ ስንት ዘመን ህዝቤ የፍቅር ዘፈን ሲናፍቀው ኖሯል፡፡ ለነገሩ ሁለት ነገር በአንዴ ማፍቀር ይቻላል እንዴ ! የአብዮት ‘ፍቅር’ አጡዞን እንዴት ብለን ነው የጠመንጃ ያዥ ሰፈሯን ደርበን የምናፈቅረው ! በፍቅር መውደቅ ብሎ ነገርን ከአገር ክህደት ጋር አመሳስለነው ነበራ፡፡ “ፍቅር መውደቅ ያለብህ ከአብዮትህ ጋር ብቻ ነው፡፡ ያኛው ፍቅር የንኡስ ከበርቴዎች ነው!” ተብሎ ነበር፡፡....

አስተያየት ይፃፉ (0 አስተያየት)

የ‘ብላክ ፓንተርሷ’ ዋካንዳ እና የእኛዋ ኢትዮዽያ

ድፍን አፍሪካ ዳር እስከ ዳር ደስ ብሏታል፣ በ‘ብላክ ፓንተር’ ፊልም፡፡ ለምን ደስ አይበላት! ለምን “ኩራት፣ ኩራት አይልሽም ወይ?” አያሰኛት! ሆሊዉድ አፍሪካን በበጎ የመሳል ታሪክም የለውም…ያውም ጀግኖች አድርጎ፣ ያውም በቴክኖሎጂ የበለጸጉ አድርጎ! አፍሪካን በተመለከተ በቅኝ አለመያዝ፣ በቴክኖሎጂ መበልጸግ፣ ጀግነነት በሆሊዉድ ፊልሞች ላይ በአንድ አረፍተ ነገር ውስጥ የሚገቡ ቃላት አልነበሩም፡፡ ‘ብላክ ፓንተር’ ይህን ሁሉ ይለውጠው ይሆናል፡፡

በዚህም ተባለ በዛ የ‘ብላክ ፓንተር’ ነገር ዓለም አቀፍ ዝና ማግኘቱ፣ ገቢ በኩንታል መዛቁሸ አንዲትን ምናባዊ የአፍሪካ አገር ታስቦ በማያውቅ ሁኔታ በበጎና፣ በሚያስጨበጭብ መልክ ማቅረቡ ብቻ አይደለም…በተጨማሪ አትዮዽያን እንደገና በበጎ በዓለም አቀፍ መልኩ ስሟን እንዲነሳ ማድረጉም እንጂ፣ የጥንቷና በጊዜዋ ገናና የነበረችው ኢትዮዽያ ማንነትና ምንነት እንደገና ዓለም አቀፍ መወያያ እንድትሆን ማስቻሉ እንጂ፣ ታላቁ የአድዋ ድልና እምዬ ምኒልክ እንደገና በዝርዝር እንዲወሱና እንዲዘከሩ ማድረጉ እንጂ፡፡

በነገረችን ላይ ከበርካታ ወራት ዓለመ አቀፍ የእለቂትና የትርምስ ወሬ መለስ ብሎ አገራችንን እንዲህ ከፍ፣ ከፍ የሚያደርጉ ወሬዎች መስማት መቻላችን እፎይታ ነገርም አለው፣ ምንም እንኳን ጊዜያዊ ሊሆን ቢችልም፡፡ የክርክሩ ዙር እየከረረ ነው…የ‘ብላክ ፓንተሯ’ ምናባዊና ቅኝ ተይዛ የማታውቅ፣ የበለጸገችና በቴክኖሎጂ እጅግ የመጠቀች አገር መነሻ ሀሳብ ከየት ነው የመጣው የሚለው ክርክር፡፡

“ፊልሙን ያዩ ኢትዮዽያውያን ለ‘ዋካንዳ ሀሳብ’ ምንጭ የሆነችው አገራቸው እንደሆነች ይናገራሉ፣” ይላል የ‘ዋሽንግተን ፖስት’ ጽሁፍ፡፡ “እንደ አውነቱ” ሲል ጽሁፉ ይቀጥላል፣ “ኢትዮዽያ፣ ወይም በአንድ ወቅት ትታወቅ እንደነበረው አቢሲንያ፣ በመካከለኛዎቹ ክፍለ ዘመናት ለአውሮፓውያን እንቆቅልሽ የሆነች፣ እጅግ የበለጸገች እንቆቀቅልሽ የሆነች ክርስቲያናዊ አገር፣ በክፉ በሚያዩዋት የሙስሊም ሀገራት የተከበበች፣ ከተራሮች ጀርባ የተሸሸገችና የመናኙ ዮሀንስ (ፕሬስተር ጆን) አገር ነበረች፡፡”

“እንዲህ አይነት ገጸ ባሀሪያትን ብዙ ጊዜ ጥቁር ሲጨወታቸው የምታያቸው አይደሉም፣” ሲል የህግ ባለሙያዋ ብሌን ሳህሉን ይጠቅሳታል፡፡ በተለይም ብሌን የሹሪን ገጸ ባሀሪይ ትጠቅስለታለች፡፡ “የእሷ ሚና ምን ያህል አስፈላጊ እንደሆነች፣ ምን ያህል ብልህ እንደሆነች… ብላክ ፓንተር የሚጠቀመው ቴክኖሎጂ በእሷ አእምሮ የተፈጠረ ነው፡፡”

ተጨማሪ ያንብቡ: የ‘ብላክ ፓንተርሷ’ ዋካንዳ እና የእኛዋ ኢትዮዽያ

አስተያየት ይፃፉ (1 Comment)

“ይቅርታ ተባሉ፣ አልተባሉ ምን እንዳያመጡ ነው”

በዛ ሰሞን ከአንዳንድ አቅጣጫዎች “ይቅርታ” የሚመስሉ ቃላቶች ሰማን ልበል! ዘንድሮ ነገሮች ሁሉ በቃላት ድሪቶና “እንዲህ የሆነበት ሁኔታ ነው ያለው…” በሚሉ የተለመዱ መቀነቶች ስለመዋጡ ምን እንደተባለና ምን እንዳልተባለ ማወቁም ግራ የሚያጋባ ሆኗል፡፡

ዳኛው ተከሳሹን…

“ለፈጸምከው ወንጀል ይቅርታ ከጠየቅህ በግሳጼ ትለቀቃለህ፣” ይሉታል፡፡
“ጌታዬ፣ ምን ብዬ ነው ይቅርታ የምጠይቀው?”
“ህብረተሰቡ ላይ ላደረስኩት ችግር ይቅርታ እጠይቃለሁ በላ!”
“ጌታዬ አኔ መች ችግር አደረስኩ?”

“ህገ ወጥ አልኮል ስታመርት ተይዘሀል፣ አይደል እንዴ!”
“እኔ፣ ጌታዬ! በጭራሽ እንደዛ አላደረግሁም፡፡”
“በጭራሽ ማለት ምን ማለት ነው! አልኮል ማምረት የሚያስችሉ መሳሪያዎች አሉህ አይደለም እንዴ?”
“እንደዛ ከሆነ ጌታዬ በአስገድዶ መድፈርም ይክሰሱኝ፡፡
“ለምን? የሆነች ሴት አስገድደህ ደፍረሀል እንዴ?”

“ጌታዬ አልደፈርኩም…ግን እንደዛ ማድረግ የሚያስችል መሳሪያው አለኝ፣” አለና አረፈው፡፡
በእርግጥ ይሄ ለፍርድ ያስቸግራል፡፡

ዘንድሮ እኛ ዘንድ ይቅርታ ሊጠየቅባቸው የሚገቡ በርካታ ጉዳዮች አሉ፡፡ ብዙ ጥፋቶች አሉ…ሆነ ተብለው ከቅንነት ጉድለት የሚፈጸሙ፣ በስልጣን ወይም በሀብት ሽፋን በማን አለብኝነት የሚፈጸሙ፣ ሳናውቅ የምናውቅ እየመሰለን በእውቀት ማነስ የሚፈጸሙ፣ “ሰለሰው፣ ስለሰው ቀድጄ ልልበሰው” በሚል አይነት አመለካከት በግዴለሽነት የሚፈጽሙ፡፡ ምነዋ ታዲያ ይቅርታ ጠያቂዎች አነስን!

በነገራችን ላይ… ይቅርታ ጥሩ ነገር ነው፡፡ የተበላሸውን ባይጠግንም ቢያንስ፣ ቢያንስ ጥፋትን አምኖ ይቅርታ ማለት መሸነፍ ሳይሆን ማሸነፍ ነው፡፡ ዝቅ ማለት ሳይሆን፣ ከፍ ማለት ነው፡፡ የመንፈስ ድክመትን ሳይሆን የመንፈስ ጥንካሬን የሚያሳይ ነው፡፡ የሚያሳዝነው ግን በግለሰብም፣ በቡድንም ሆነ በድርጅት ደረጃ ይቅርታ መጠየቅ በራስ ላይ እድሜ ይፍታህ መፍረድ የሚመስላችው በዝተዋል፡፡

“ይቅርታ ተባሉ፣ አልተባሉ ምን እንዳያመጡ ነው” አይነት አመለካከት የብስለት ምልክት አይደለም፡፡

ተጨማሪ ያንብቡ: “ይቅርታ ተባሉ፣ አልተባሉ ምን እንዳያመጡ ነው”

አስተያየት ይፃፉ (0 አስተያየት)

“የእኔን ሥራ የሰው ልጅ ቀማኝ”

ክፋት በዝቷል፡፡ “እርጥቡን ከደረቅ አደባልቀውና፣” አይነት ክፋት በዝቷል፡፡ አገሪቷ ምርምር ያልተለመደባት አገር ሆና ነው እንጂ ይህን ጊዜ “እንዴት ነው እዚህ ደረጃ ላይ ልንደርስ የቻልነው?” መሰል ምርምሮች የሚያስፈልጉበት ጊዜ ነበር፡፡ ዙሪያችንን ስለ ክፋት የምንሰማው ትረካ በገዛ ጥላችን እንኳን እንድንደነብር የሚያደርግ ነው፡፡

“ሁልጊዜ ለክፋት አሳቡ እያደላ
ተንኮልን የሚወድ ፍቅርን የሚጠላ
ደግ ለዋለለት ክፉ የመለሰ
ይሙት በህሊናው እየተወቀሰ”
ይላሉ ከበደ ሚካኤል፡፡ ለደግ ክፉ የመለሰ በህሊናው የሚወቀስበት ዘመን አለፈብን እንዴ !

ባለፉት ወራት በተለያዩ አካባቢዎች በተከሰቱ አሳዛኝ እና ነገ በታሪክ ፊት፣ ምናልባትም ለአማኞች በሰማዩ መንበርም የሚያስጠይቁ ችግሮች ሲከሰቱ ብዙ ለትዝብት የሚዳርጉ ነገሮች ታይተዋል፡፡ ከምንጊዜም በላይ “አንተም ተው አንተም ተው” በሚያስፈልግበት ሰዓት፣ ከምንጊዜም በላይ ከሁሉም ነገሮች በላይ ሰብአዊነት መግነን በነበረበረበት ሰዓት የተከመረብን የጥላቻ ደመና አስፈሪ ነበር፡፡ በተለይ በማህበራዊ ሚዲያ ገንቢና የአገራችን የወደፊት እጣ ፈንታ ያሳሰባቸው ጽሁፎች የነበሩትን ያህል እጅግ በሚያስፈራ ደረጃ ጥላቻ ጥግ የሄዱ ጽሁፎችም በርካታ ነበሩ፡፡

ምናልባትም ሰዎች በሁኔታው እጅግ በመበሳጨታቸው የተነሳ የሚጽፉትን በሚገባ ሳያስቡበት ቀርተው ሊሆን ይችላል፡፡ አገራቸው ላይ እንዲህ አይነት አስከፊ ሁኔታ በማየታቸው ተስፋ ቆርጠውም ሊሆን ይችላል፡፡ ምክንያታዊነት በስሜታዊነት ተተክቶ ይሆናል፡፡ ምንም ይሁን ምን ግን የጥላቻው መጠን አስፈሪ ነው፡፡ ምንም ይሁን ምን ግን “ለመጪው ትውልድ ምን አይነት አገር እየተውንለት ነው?” የሚያሰኝ ነው፡፡ ምንም ይሁን ምን ግን “በዚህ ሁሉ ጥላቻ መሀል ማን አትርፎ ማን ሊከስር ነው!” የሚያሰኝ ነው፡፡ በጥላቻ አሸናፊና ተሸናፊ አይኖርምና!

አለኝ አንድ በሬ እንደ እኔ የከፋው
በደሌን ብነግረው የጉንጩን ሳር ተፋው
ይላል የአገሬ ሰው፡፡ በሬውም “ለካስ ከእኔም የባሰ አለና!” ብሎ መሆን አለበት፡፡ ለምን አይል! የክፋት ተግባራት ጥግ ድርስ የሄዱበት ነውና!

ዲያብሎስ ወደ ሰማይ ቤት ሄዶ ካላስገባችሁኝ ይላል፡፡
“ምን ፈልገህ ነው?”
“መኖር ስላልቻልኩ አቤቱታ ላቀርብ ነው፣” ይላል፡፡

“በል ከዚህ ጥፋ!” ብለው የሰማይ ቤት ደንብ ማስከበሮች ያባርሩታል፡፡ በተደጋጋሚ ቢመላለስም የሚያስገባው አላገኘም፡፡ እሱ ግን ተስፋ አልቆረጠም፡፡ የሆነ ቀን በር ላይ ሲጨቃጨቅ አንድ መልአክ፣ “ይሄን ያህል የሚያመላልስህ ጉዳዩ ምን ቢሆን ነው?” ይለዋል፡፡
“አቤቱታ አለኝ፣ አቤቱታዬን ካልተቀበላችሁኝ መመላለሴን አልተውም፣” አለ፡፡ መልአኩ አቤቱታውን በወረቀት ጽፎ እንዲሰጠው አደረገ፡፡ አቤቱታው በጉባኤ ከታየ በኋላ ዲያብሎስ ተጠራ፡፡

“ይሄን አቤቱታ በእርግጠኝነት የጻፍከው አንተ ነህ?” 
“አዎ፣ እኔ ነኝ፡፡ ሲመረኝ ምን ለድርግ!” የጻፈው አንድ አረፍተ ነገር ብቻ ነው፡፡ “የሥራ ዘርፍ ለውጥ ይደረገልኝ፣” ይላል፡፡ 
“ለምንድነው የሥራ ዘርፍ ይለወጥልኝ ያልከው?” ሲባል መልሱን ሰጠ…
“የእኔን ሥራ የሰው ልጅ ወሰደብኛ፣”

ተጨማሪ ያንብቡ: “የእኔን ሥራ የሰው ልጅ ቀማኝ”

አስተያየት ይፃፉ (1 Comment)

በመንገዱ ርቀት እና አስቸጋሪነት ሳቢያ ልጆችዎ ቶሎ ቶሎ ወደ ቤት እየመጡ ሊጠይቅዎት ካልቻሉ ምን ያደርጋሉ ?

በመንገዱ ርቀት እና አስቸጋሪነት ሳቢያ ልጆችዎ ቶሎ ቶሎ ወደ ቤት እየመጡ ሊጠይቅዎት ካልቻሉ ምን ያደርጋሉ ? እርስዎ ራስዎ ይሄዳሉ ወይንስ…የ45 ዓመቱ ሕንዳዊ ጃላንድሃር ናያክ ግን ዶማ እና ድንጋይ መፈንቀያውን ይዞ ተነሳ - መንገድ ሊሰራ፡፡

እናም አደረገው…

በምስራቅ ሕንድ ባለች አንዲት የገጠር መንደር ውስጥ የሚኖረው ናያክ፤ 3 ወንድ ልጆቹ የሚማሩት 10 ኪሎሜትሮች ርቀት ላይ ባለ ትምህርት ቤት ውስጥ ነው፡፡ እናም … በርቀቱ ሳቢያ ልጆቹ ቶሎ ቶሎ ወደ ቤታቸው እየመጡ አያያቸውም፡፡ ለዚህም ችግር መፍትሄ ፍለጋ የዛሬ 2 ዓመት ግድም መንገድ ለመስራት ዶማ እና ድንጋይ መፈንቀያውን ይዞ ተነሳ…

እናም የቢቢሲው ድረገፅ ዘገባ እንደሚለው ሕንዳዊው አባት ያለማንም እርዳታ ብቻውን በአካፋና ዶማ 8 ኪሎሜትር መንገድ ሰራ፡፡

የናያክ ልጆች ከትምህርት ቤት ወደ አባታቸው ቤት 5 ኮረብታዎችን አቆራርጠው ለመምጣት የ3 ሰዓታት ያህል የእግር ጉዞ ማድረግ ይጠበቅባቸው ነበር፡፡

ናያክ ግን ይህን ልጆቹን ቶሎ ቶሎ ወደ ቤታቸውን እንዳይመጡ ያደረገውን እንቅፋት ለማንሳት ላለፉት 2 ዓመታት በቀን 8 ሰዓታት በዶማ እና ድንጋይ መፈንቀያው አለት ሲፈነቅል፣ ጉብታ ሲንድ ከርሞ 8 ኪሎሜትር መንገድ ሰራ ይለናል የቢቢሲው ዘገባ…

ተጨማሪ ያንብቡ: በመንገዱ ርቀት እና አስቸጋሪነት ሳቢያ ልጆችዎ ቶሎ ቶሎ ወደ ቤት እየመጡ ሊጠይቅዎት ካልቻሉ ምን ያደርጋሉ ?

አስተያየት ይፃፉ (0 አስተያየት)
Sheger 102.1 AudioNow Numbers