• Slider One

    የምስል ተጓዳኝ መልዕክት

  • Slider Two

    የምስል ተጓዳኝ መልዕክት

  • Sldier Three

    የምስል ተጓዳኝ መልዕክት

ሸገር | ወግ

እሯጭና አሯሯጭ

በስፖርታዊ ውድድር ላይ በተለይ በሩጫው በደንብ ይታወቃል፡፡ ብዙ ሪከርዶች ስብርብራቸው የወጣው በነዚህ ሰዎች አጋዥነትና ድጋፍ ነው፡፡ እነዚህ ሰዎች በስፖርታዊ ስማቸው አሯሯጮች ( Pace Maker) ይባላሉ፡፡ ስራቸው እንደሚታወቀው ዙር ማፍጠን እና ማክረር ከዛ ይህንን እንዲያደርጉላቸው በሚል የሚቀጥሯቸው ዋነኞቹ አትሌቶች በሚፈለገው ደረጃ ዙሩ ከጦዘላቸው በኋላ እነዚህ አሯሯጮች ስራቸውን ተወጥተዋልና ሩጫውን አቋርጠው ይወጣሉ፡፡ ከውድድሩ በኋላ በሚገቡት ውል መሠረት ገንዘባቸውን ያገኛሉ፡፡ ለማንኛውም እነዚህ አትሌቶች ቀድመውም ውድድሩን ሲጀምሩ በአሯሯጭነት የሚመዘገቡ እና የሚለዩ ስለሆነ ገና ውድድር ሲጀመር እገሌ የእገሌ አሯሯጭ ነው ብለን በቀላሉ እንለያቸዋለን፡፡ ብቻ ይህንን እዚ ጋር እንተወውና በህይወታችን ውስጥ እየገቡ እሯጭ ይሁኑ አሯሯጭ እንዳይለዩ ሆነው ዙሩን እያከረሩብን በኋላ አቋርጠው ወደሚወጡብን አሯሯጮች እንለፍ፡፡እንዴ! መለየት አቃተን እኮ የውድድሩ ተሳታፊ ናቸው ብለን አብረን እንጀምርና ወይንም ከጀመሩ በኋላ እንቀላቀላቸውና በመሀከል እብስ ይሉብናል፡፡ ለማሸነፍ የሚሮጡ ስለሚመስለን በፈጠኑ ጊዜ እኛም እንፈጥናለን እርቀውን እንዳይሄዱ እንከተላቸዋለን፡፡ እንደነዚህ አይነት አሯሯጮች በየቦታው አሉ፡፡ በስራ ቦታ የእርሶ ህመም ያመማቸው ቁስሎት የጠዘጠዛቸው መስለው አብረዋችሁ ይጮሀሉ፡፡ 

እርሶም ጉዳዩ የጋራችን ነው መላ ልንፈልግ ይገባል፤ እያሉ ውስጦ ያለውን ሀሳብ ሁሉ ይዘረግፈላቸዋል፡፡ ሚስጥሮን ሁሉ ይናገራሉ፡፡ ቆይቶ ግን እርሶ ሚስጥር ብለው ያካፈሉት ሁሉ የአደባባይ ሚስጥር ሆኖ ከሀላፊዎችና ከሌሎቹም ጆሮ ደርሶ ያገኙታል፡፡ ገና ይሄኔ ነው እንግዲህ የውስጦን እንዳለ ሲያጠኑ የነበሩት ግለሰብ ግዳጃቸውን ተወጥተው የሚያቋርጡ አሯሯጮች እንጂ ሩጫውን ለመጨረስ የገቡ አለመሆናቸውን የሚረዱት፡፡ ከዚህ በኋላ ቢያውቁት ምን ሊፈይዱ አንዴ ነገር ተበላሽቷል፡፡
እነዚህ አሯሯጮች የሚገኙበት ሌላ ቦታን እናንሳ ከዛው ከመስሪያ ቤት አልወጣንም፡፡ ስለ አንድ ጉዳይ የሚደረግ አጠቃላይ ስብሰባ ነው ብለን እንወሠድ፡፡
አንዳንዴ ከላይ ያለው አለቃና ከታች ያለው ሠራተኛ መሀከል የሀሳብ ልዩነት ሊኖር ይችላል እናም ከታች ያለው ሠራተኛ በዚህ ስብሰባ የመጣው ይምጣ ሀሳባችንን እናነሳለን ይባባላሉ፡፡ እንዲህ አይነቷን ነገር የጠረጠረው አለቃ ከዛው ከሠራተኛው ውስጥ እንዴት ነው እያሉ ሀሳብ የሚሠበስቡና የስብሠባውን ሀሳብ ወዳልታሠበ መንገድ እንዳይሄድ የሚያደርጉ አሯሯጮች በተለያየ ጥቅም በመያዥ ያሠማራሉ፡፡
እናም ስብሠባው ይጀመራል፡፡ ሀላፊው መናገር የፈለጉትን ተናግረው እንደጨረሱ አሁን ሀሳብ ካላችሁ እቀበላለው እጅ እያወጣችሁ፡፡
ከዛ የነዛ አሯሯጮች እጅ ከሌሎቹ ጋር አብሮ ይወጣል፡፡ ሀላፊውም ከአሯሯጮቹ ለተወሠኑት የመጀመሪያውን እድል ይሠጣሉ፡፡ ከዛም እነዚህ ሰዎች በየተራ ተነስተው የታሠበው ሀሳብ ላይ ውሃ ቸልሰውበት ቁጭ ይላሉ፡፡ የተቀሩት አሯሯጮች በጭብጨባ ያጅቡአቸዋል አመሠግናለው ብለው ይቀመጣሉ፡፡
ከዚህ በኋላ ማነው ልብ ያለው የተቃውሞ ሀሳብ የሚያነሳ አሯሯጮቹ ስራቸውን ሠርተው ሩጫቸውን አቋርጠው ይወጣሉ፡፡ ሰብሳቢውም አሸናፊ ሆነው ስብሰባውን ያጠናቅቃሉ፡፡
እንዲህ አይነቱ ጉዳይ በብዙ ቢሮዎች የተለመደ ነው፡፡
በሌላውም ስራ እንደዛው ነው በተለይ ተመሳሳይ የስራ ዘርፍ ላይ በተሠማሩ መሀከል አንድ ተፎካካሪ በመምሠል ዙሩን ያከረዋል እርሶም ካልተፎካከሩ ወድቀው መቅረቶት ነውና ከፈጠነው እኩል ለመጓዝ ፍጥነቶን ይጨምራሉ፡፡
እናም በስተመጨረሻ ዙሩን ከፊት ሆኖ ሲያከር የነበረው የሚጠበቅበትን ከሠራ በኋላ ሩጫውን አቋርጦ ይወጣል፡፡
በተለይ በፖለቲካ ነክ ጉዳዬች ውስጥ እነዚህ አሯሯጮች በቁጥርና አይነት በዝተው ነው የሚገኙት፡፡
በደካማ ጐኖ ሊያግዞት፣ሊደግፎት፣ሀሳቦን ሊጋሩ የመጡ መስለው ይቀርቦታል፡፡ እርሶም ሰው አገኘው ብለው የሚያውቁትን፣ ቢሆን የሚሉትንና የሚያስቡትን ሁሉ ይዘከዝኩላቸዋል፡፡ እነሱም ልክ ነው እያሉ ሁሉን ይሠማሉ፡፡
አንዳንዴ የሚያስጠይቅ የሚያስከስስ የሚባለውን ሁሉ ሳይቀር ቀድመው እየነኩ እርሶንም ማኖ ያስነኳሆታል፡፡
ከዛም የሚጠበቅባቸውን ከጨረሱ ማኖ ካስጠፈጠፎ በኋላ ድንገት ስንት የተማመኑባቸው ሩጫቸውን አቋርጠው ይወጣሉ፡፡
እርሶም ነገር ካከተመና ካለቀለት በኋላ ከጐኖ ሆነው አለሁልህ ሲሉ የነበሩት ሁሉ ሩጫውን አብረው ለመጨረስ የገቡ ሳይሆኑ ዙሩን አጡዘው ለመውጣት የገቡ አሯሯጮች መሆናቸውን ይረዳሉ፡፡ ደጋግመው ለነኩት ማኖም አሁን ፊሽካው ተነፍቶ የእጆ ይሠጦታል፡፡
ከፊት እየሆኑ ዙሩን ሲያከሩ ሌላው ሲከተላቸው በመሀከል ድንገት ሩጫዬን ጨርሻለው ብለው አቋርጠው የወጡ ብዙ ሰዎችን እናውቃለንና እነሱ የሀሳቤ ማጠናከሪያ ይሆኑኛል፡፡
ለማንኛውም እስቲ ተመራርቀን እንጨርስ፡፡
ሩጫውን ከጀመሩ የሚጨርሱ
ካልጨረሱ የማይጀምሩትን ያብዛልን!
አስተያየት ይፃፉ (0 አስተያየት)

በነካ እጃችን ይቅር እንባባል

ሳምንቱ እንዴት አለፈ? መቼም የሳምንቱ ትልቁ ወሬ ምን ነበር ተብሎ ቢጠየቅ የምንበዛው እንዴ ይቅርታ መባላችን ነዋ! ያውም በፕሬዝዳንታችን የምንል ይመስለኛል፡፡ ለኔ በግሌ የሳምንቱ ብቻ ሳይሆን ያለመድኩት ስለሆነ ከማረሳቸው ቀኖች ውስጥ አንዱ ነው ብዬ ለመናገር እችላለው፡፡ ይህ ማለት ግን ይቅርታውን ብቀበልም ሌላ ጥያቄ የለኝም ማለት አይደለም፡፡ ባለፈው ሳምንት ፓርላማው ስራ ሲጀምር ፕሬዝዳንት ዶ/ር ሙላቱ ተሾመ በመብራት መቆራረጥ ለገጠማችሁ መንገላታት ይቅርታ እንጠይቃለን አሉን፡፡ ይቅርታው በጣም የዘገየ ቢሆንም አንዳንዶቻችን መብራት ጠፍቶብን መረጃውን በስልካችን ሬዲዬ ሰምተን ይቅርታውን ተቀብለናል አልን፡፡ ለማንኛውም ግን ይቅርታ መባባሉን መልመዳቸን መልካም ነገር በዘመኗ አማርኛ ደግሞ ‹‹ቀጣይነት ሊኖረው የሚገባ›› ቢሆንም ይቅርታውን የበለጠ አስደሳች ለማድረግ በስራው ውስጥ ያሉት ማድረግ ያለባቸውን ማድረግ ጥፋት ሠርተው ከሆነም እነሱም ይቅርታ ማለት አለባቸው፡፡ በይቅርታው ወቅት፣ የተጀመሩ ፕሮጀክቶች እስኪጠናቀቁ በትእግስት መጠበቅ እንዳለብን ተነግሮናል፡፡ ይሄ የግድ ነውና ብዙዎቻችን የምንቀበለው ይመስለኛል፡፡

ግን እነዚህ ሲጠፋ በቶሎ አይመጡም የሚባሉት ሰውን ጨለማ ውስጥ አስቀምጠው በገንዘብ ይደራደራሉ እየተባሉ የሚታሙት አንዳንድ የመብራት ሀይል ሠራተኞችንና ደውሉ ብለው ስልክ እየሠጡን በችግር ጊዜ ስንደውል የማያነሱትን ሠራተኞች እስከ መቼ ነው የምንታገሳቸው፡፡ እነሱም በመሠራት ላይ ነው እንደተባለው ፕሮጀክት በሂደት ነው እንዴ ግዴታቸውን እያወቁ የሚመጡት፡፡ ለማንኛውም እነሱም ይቅርታ ብለው ከቸግራቸው ከታረሙ ይቅርታው የበለጠ ያማረ ይሆናል፡፡ ከዚህ ውጪ ይቅርታው ለምን ለመብራት ብቻ ሆነ የሚል ጥያቄንም የባለፈው የይቅርታ ቃል ፈጥሮብኛል፡፡ 

ተጨማሪ ያንብቡ: በነካ እጃችን ይቅር እንባባል

አስተያየት ይፃፉ (0 አስተያየት)

አዲስ ዓመት መጣ የቋጠርካትን አውጣ

አዲስ ዓመት አዲስ በመሆኗ ትፈራለች እንጂ በደንብ አብጠርጥረን ካየናት ከእንቁነቷ ጣጣዋ የሚብስ ይመስለኛል፡፡ ክፍያ የሌላት ጳጉሜን አስከትላ መጥታ ልክ አግብታን ስታበቃ የበዓል ሽርጉድ ወጪን ታስከትልብናለች፡፡ ቤተሰብ ልጅ ካለ ደግሞ አዲስ ልብስ ፣አዲስ ጫማ እረ ምኑ ቅጡ፡፡ ግን የምንበዛው ሺህ አመት አይኖር በሚል አሊያም ገና በዓመቱ መጀመሪያ የምን ማማረር ነው፣ ገና በዓመቱ መጀመርያ ሮሮ ከጀመርኩኝ ዓመቱን ሙሉ አይለቅኝም በማለት ሁሉን ዋጥ አድረገን የቋጠርናትን ሆጭ እናደርግላታለን ለአዲስ ዓመት፡፡ አዲስ ዓመት መቼ በዚህ ብቻ ትላቀንና በዓሉን አለፍ እንዳልን ትምህርት ይመጣል፡፡ ለወሮች ዝግ ሆነው የሠነበቱት ትምህርት ቤቶች ይከፈታሉ፡፡ አዲሱ የአዲስ አመት የወጪ ምዕራፍም አፏን ከፍቶ ወደ እርሶ ይመጣል፡፡
መቼም ከዓመት ዓመት የሚጨምር እንጂ የሚቀንስ ነገር እንደሆነ እንደናፈቀን ቀርቷል፡፡ በየቦታው የሚለጠፈው ነገር ሁሉ በኑሮ እና በእቃ ውድነት አለያም በነዳጅ ዋጋ መጨመር ምክንያት የዋጋ ማስተካከያ አድርገናል የሚል ነው፡፡ ደግሞ ቃሉ ጭማሪ አይባልም ‹‹ማስተካከያ›› ነው፡፡

ሰው ግራ እያገቡ እና ለብቻው እንዲያወራ እያደረጉ ማስተካያ፡፡ ለነገሩ ነጋዴዎቻችንም ይህቺን ዋጋ እየጨመሩ ማስተካከያ አድርገናል ማለትን የለመዱት ከመንግስት ይመስለኛል፡፡ የነዳጅ ዋጋ ጨምሮ ማስተካከያ የትራንስፖርት ታሪፍን ከፍ አድርጐ ማስተካከያ በሌላው ጭማሪ አድርጐ ማስተካከያ አድርጌያለው የሚለን መንግስት ነው፡፡ ቆይ እሱን ተወት እናድርገውና ይሄ የትምህርት ቤት ክፍያና የቁሳቀስ ወጪ ነገር አፋጣኝ መላ የሚፈልግ ይመስለኛል፡፡ እንዴ እንደዋዛ ሀምሌና ነሰሴን ተማሪው አርፎ ሲመለስ የሚጠየቀው የምዝገባ፣ ወርሀዊ ክፍያ በጣም አስደንጋጭ እየሆነ እኮ ነው፡፡ መቼም በዚህ ጊዜ በቃ ማስተማር አልችልም አቅም የለኝም ተብሎ ልጅን ከቤት ማስቀመጥ አይታሠብ ነገር፡፡ ደግሞ ከምዝገባውና ከወርሀዊ ክፍያው ውጪ ትምህርት ቤቶቻችን አሟሉ እያሉ መጠየቅ የጀመሩት የቁሳቁስ አይነት ደግሞ ግራ የሚያገባ እየሆነ ነው፡፡ እንዴ ልጄን ወደ ትምህርት ቤት ነው ወደ ሌላ ቦታ ነው የምልከው ብለው እንዲያስቡም እያደረገ ነው፡፡ እንደ ሩጫ ሲከብድ አቋርጦ አይወጣ ነገር ትምህርት ነው፡፡ ያውም ለውድ ልጅ የሚደረግ፡፡

ደግሞ እኮ መንግስትም ቢሆን የሚደረገው የዋጋ ጭማሪ ተገቢ አለመሆኑን እና የተጋነነ መሆኑን በተደጋጋሚ በተለያየ መንገድ ሲናገር ይሰማል፡፡ ግን እርምጃ መውሠዱ ላይ ‹‹እንቃወማለን›› ብሎ እንደመናገሩ የተበረታ አይመስለኝም፡፡
ዛሬ ዛሬ ለመያዝ እና ለመቆጣጠር እንኳን ያስቸግራሉ ምን አድራሻ አላቸውና የሚባሉ የንግድ አይነቶችን ሁሉ መንግስት ተቆጣጣረ ሲባል እየሠማን እነዚህ በደንብ ተደላድለውና ለቁጥጥርም ተመቻችተው ያሉ አልጠግብ ባይ ትምህርት ቤቶችን መቆጣጠሩ ክብደቱ ምኑ ላይ እንደሆነ አልገባኝም፡፡ በፊት ይህ አስደንጋጭ የሚባል የትምህርት ቤት ጭማሪ ቅንጡ የሚባሉት ትምህርት ቤቶች ላይ ተደረገ ሲባል ነበር የምንሠማው አሁን ግን ይህ ክፉ በሽታ መካከለኛና አነስተኛ የሚባሉት ጋርም ደርሷል፡፡

ተጨማሪ ያንብቡ: አዲስ ዓመት መጣ የቋጠርካትን አውጣ

አስተያየት ይፃፉ (1 Comment)

እቅድ ዶሮ...አፈፃፀም ሽሮ

ይህቺን አባባል ማን እንደተናገራትና የት እንደሰማዋት ባላስታውስም ሀሳቤን ትገልፀዋለችና ርእስ እንድትሆነኝ መረጥኳት፡፡ አዲሱ ዓመት መጣ፣ ባለፈው ሳምንት 2006ዓ.ም ስንለው የነበረው ዓመት 2007 ዓ.ም ሆኖ ከሱም ላይ ዛሬ 6ኛው ቀን ሊነሳለት ነው፡፡ እናም 2007 ከ359 ቀኖች በኋላ አሮጌ የሚለው መጠሪያ ይለጠፍለታል፡፡ መንግስት ሰኔ 30ን የበጀት መዝጊያ ሀምሌ አንድን የአዲስ የበጀት ዓመት መጀመሪያ ብሎ ይጠራዋል፡፡ በዚህ ሰሞንም የአሮጌው ዓመት ስራ ግምገማ የአዲሱ በጀት ዓመት እቅድ ወሬ ይበዛል፡፡ ከታቀደው ምን ያክሉ በየዓመቱ ከዳር እንደሚደርስ ግን ሁላችን የምናውቀውና የምንሠማው ነው፡፡ ልክ እንደመንግስት እኛም አዲስ አመት ሲመጣ እቅድ አንድ ሁለት እያልን የእቅድ አይነት እንደረድራለን፡፡ 
በአዲሱ ዓመት የተጣላዋቸውን እታረቃለው ያስቀየምኳቸውን ብቻ ሳይሆን ያስቀየሙኝንም ጭምር፣ ከገባሁበት የመጠጥ፣ የጫት፣የሲጃራ፣ የአደንዛዥ እፅ ሱስ ነፃ እሆናለው፣ ትምህርቴን ካቆምኩበት እቀጥላለው፣ ትዳር እይዛለው፣ ልጅ እወልዳለው ወ.ዘ.ተ ብቻ የእቅድ አይነት ይደረደራል፡፡
ግን ከምናቅደው ምን ያክሉን በዓመቱ መጨረሻ ከዳር እናደርሰዋለን አሊያም የምናቅደውስ ምን ያክል የምንፈልገውንና የተዘጋጀንበትን ነው ብለን ስንጠይቅ ታሪኩ ሌላ ይሆናል፡፡
የምንበዛውም በአዲስ ዓመት ይታቀዳል ሲባል ሠምተን እንጂ ተዘጋጅተን የምናቅድ አይመስለኝም እናም ዓመቱ መጨረሻ ላይ እንዴት ነው ሲባሉ ሞከርኩ አልተሳካልኝም ይላሉ፡፡
ደግሞም በብዞዎቻችን የአዲስ አመት እቅድ ተብለው የሚቀርቡት ሀሳቦች ዓመትን መጠበቅ ያለባቸው አይመስለኝም፡፡
አሁን የተጣሉትን ለመታረቅ አዲስ ዓመትን መጠበቅ ምን የሚሉት ነው?

ተጨማሪ ያንብቡ: እቅድ ዶሮ...አፈፃፀም ሽሮ

አስተያየት ይፃፉ (0 አስተያየት)

ቻው ቻው አንተ ሠልፋም ዓመት

ስለጊዜ ስናስብ ስለዘመን ለውጥ ስናወራ በዘመን እና ጊዜ ውስጥ አብረው የመጡና ያለፉ እንዲሁም ጊዜ ጥሎአቸው የሄደ ክስተቶችም አብረው ይነሳሉ፡፡ እኔ... ያጠፋውን አጥፍቶ ያቀናውን አቅንቶ እብስ ሊል ከጫፍ ስለደረሰው 2006ዓ.ም ሳስብ ከውስጥም ከውጪም በተለያየ ምክንያት መሠለፋችን የበዛበት ዓመት ሆኖ እንዳለፈ ይሠማኛል፡፡ ከውጪ የብዙዎቹ መነሻ ፖለቲካዊና ኢኮኖሚያዊ ጥያቄ ነበር፡፡ ከአፍሪካ እንደምሳሌ የነግብፅና፣ሊቢያ የነናይጄሪያና ደቡብ አፍሪካ የተቃውሞ ሠልፍ፤ከተቀረው ዓለም የነቱርክና ታይላንድ የነግሪክና ፓኪስታን የተቃውሞ ሠልፎችን ማንሳት ይቻላል፡፡ ብራዚል እንኳን ታላቁን የአለም እግር ኳስ ዋንጫ ጨዋታን አስተናግዳ ያጠናቀቀችው በዚሁ በህዝባዊ ተቃውሞ ታጅባ ነው፡፡
ወደኛው የውስጥ ጉዳይ ስንመለስም 2006 ሠልፋም ዓመት ነው ብዬ አስባለው፡፡

በተለያየ ምክንያት አውቀነውም ይሁን ሳናውቀው ተሠልፈናል፡፡ በፖለቲካውም ቢሆን የተቃዋሚ ፓርቲዎች የጠሩአቸው ህዝባዊ የተቃውሞ ሠልፎች በአዲስ አበባና በክልል ከተሞች በተደጋጋሚ በዚው በሠልፋም ዓመት ተካሂዶአል፡፡
ያላት የከተማ ትራንስፖርት አማራጭ ቁጥር ከህዝቧ ቁጥር ጋር አልጣጣም ብሏት በተለይ በስራ መግቢያና መውጪያ ሰዓት የተኮለኮለ ህዝብን ማየቱን የተለማመደችው አዲስ አበባ ነዋሪው ከታክሲ ግፊያ ወደ ሰልፍ እንዲሸጋገር ያደረገችው በዚው በ2006 ሠልፋም ዓመት ነው፡፡ መነሻው ከሜክሲኮ አካባቢ እንደሆነ የሚነገርለት የታክሲ ሰልፍ ዛሬ ተለምዶ ጠዋትና ማታ መሠለፍ ነው፡፡ በግርግር ከኪስ አውላቂዎች የጠበቀን የታክሲ ሠልፍ አንዳንዴ ደግሞ የሠልፉ እርዝመት የ1 ብር ከ50 ሳንቲም መንገድ ያክል ተቀጣጥሎ ሀሞታችንን ፍስስ ሲያደርገውም ከርሟል፡፡

መታየት ከጀመረ ሰንበትበት ቢልም በየዳቦ ቤቱ በተለይ ምሽት ላይ ዳቦ ሸምቶ ለመግባት ረጃጅም ሠልፍ መታየቱም በዚህ ሰልፋም ዓመት የባሠበት ይመስለኛል፡፡ እንዴ እረ ምን ይሄ ብቻ! ለስንዴ፣ ለስኳርና ለዘይትም የተሠለፍናቸው ሠልፎችስ? በየቀበሌውና ሸማቾች በራፍ እንደጉድ አይደል እንዴ የተሠለፍነው፡፡

በየነዳጅ ማደያውስ የተሠለፍነው ለቤት ፍጆታችን ጀሪካኖቻችንን ይዘን አሽከርካሪውም መኪናውን ሠልፍ አስይዞ በተለይ በወሩ መጨረሻ ከ25 እስከ ከ26 በኃላ ገና ለገና ነዳጅ ይጨምሯል አልያም ይጠፋል በሚል የመኪናው ሠልፍ የጉድ ነው፡፡
በየባንኮቹ ለቤት ምዝገባ ለ40/60 ለ20/80 እና ለ10/90 በሚል ለስንት ቀን ተሠለፍን ያ ጊዜ አለፈና ደግሞ ገንዘብ ለመስጠት ሌላ ሠልፍ፡፡
ኔትዋርክ የለም፤ደካማ ነው፤ መብራት ጠፋ እየተባልን ገንዘብ ለመክፈል እንዲሁም ለመላክና ለመቀበል በየባንኩ ስንሠለፍም ከረምነው፡፡
ወደ እስፖርታችን እንለፍ መቼም ዘንድሮ ለአፍሪካ ዋንጫና ለዓለም ዋንጫውም ትንሽ ቀረብ ማለት የቻልንበት ደጋፊውም ከነማንቼና አርሴ ጊዜውን ሸርፎ ስለዋሊያዎቹ ለማውራት የቻለበትም ዓመት ነበር፡፡ ታዲያ በእግር ካሱም ይህቺ ነቃ ነቃ ማለት መምጣቷን ተከትሎ ካምቦሎጆአችንም ወደ ውስጥ በሚገቡ ሠልፈኞች ተጨናንቆ ነበር፡፡ ኳሳችንማ ሙሉ ሌት ከቀን የዘለቀ የደጋፊዎች ሠልፍንም አሳይቶናል፡፡
መቼም ቢሆን በዙሪያቸው ተመጋቢ ተመልካችና አድናቂ የማያጡት ስጋ ቤቶቻችን በፆም መግቢያና መውጪያ የሚሠለፍላቸው መብዛቱም ዘንድሮ ብሶበታል፡፡ ዝነኛ ከሚባሉት ልኳንዳ ቤቶቻችን እስከ አነስተኛዎቹ የቀበሌ ቤቶች በፆም መግቢያና መውጪያ ወቅት በሠልፍ ሲጨናነቁ ተመልክተናል፡፡
ሌላው ዓመቱን ሙሉ ሲያሠልፈን የከረመው ደግሞ የውሃ ችግር ነው፡፡ ከየቧንቧችን መምጣቷ ብርቅ የሆነብን ውሃ እዚህ ሰፈር መጥታለች ሲባልና ጀሪካኖቻችንን ተሸክመን ስንጓዝ እሷን ብለው ከየአካባቢው የመጡ በቁጥር ሲበዙ ሠልፍ ስንገባ ዓመቱ አለፈ፡፡
በየአካባቢው የተቀመጡት ነጫጮቹ የውሃ ማጠራቀሚያዎች ዙሪያም እነሰም በዛም ለተራ የሚሠለፍ አልጠፋም፡፡
ብቻ ምን ያልተሠለፍንበት አለ፡፡ የነሱ የመምጫ ጊዜ ብርቅ እየሆነ ወርሃዊ የመክፈያ ጊዜያቸው ቶሎ ቶሎ የሚመጣው መብራትና ውሃ እንዲሁም ስንት ሲታማ የከረመው ስልክም በአገልግሎታቸው እያበሳጩን ለወርሃዊ ክፍያቸው ሲያሠልፋን ከርመዋል፡፡
ለግብር፣ ለፊልምና ትያትር እንዲሁም ለሙዚቃ ኮንሠርት እንደከዚህ ቀደሙ ዘንድሮም ደጅ ጠንተናል፣ ተሠልፈናል፡፡
ይህንን ሁሉ ያሳየን ዓመት ሊጠናቀቅ ከጫፍ ደርሷል፡፡ አዲሱ ዓመት ሊቀበለንም እጁን ዘርግቷል፡፡
እኔም መልካም መመኘት መልካም ነውና
መጪውን ዓመት እንኳን በደህና መጣህ
ተሠናባቹን ቻው ቻው አንተ ሠልፋም ዓመት ብዬዋለው፡፡
አስተያየት ይፃፉ (3 Comments)
Sheger 102.1 AudioNow Numbers